Imran اردو ورلڈ کینیڈا ( ویب نیوز ) سمندری طوفان لی گزشتہ روز مغربی کینیڈا کے صوبے نووا سکوشیا سے ٹکرا گیا، جس سے سڑکوں پر سیلاب آ گیا، درخت اکھڑ گئے اور شمالی بحر اوقیانوس کے ساحل کے قریب ہزاروں افراد بجلی سے محروم ہو گئے۔
طوفان کی زد میں آنے سے ایک شخص جان کی بازی ہار گیا، مقامی میڈیا نے بتایا کہ امریکی ریاست مین میں گاڑی پر درخت گرنے سے ایک شہری ہلاک ہوگیا۔
یہ بھی پڑھیں
لیبیا میں سمندری طوفان ، ہلاکتوں کی تعداد 5 ہزار سے تجاوز کر گئی
یو ایس نیشنل ہریکین سینٹر (این ایچ سی) نے اپنی تازہ ترین ایڈوائزری میں کہا ہے کہ کل ہیلی فیکس کے جنوب مغرب میں ایک چھوٹے سے جزیرے لانگ آئی لینڈ پر لینڈ فال کرنے کے بعد، لیہ شمال کی طرف بڑھ رہا ہے ۔ تقریباً 65 میل فی گھنٹہ کی رفتار سے ہوائیں چل رہی ہیں۔سمندری طوفان لی اب ایسٹ پورٹ، مین سے تقریباً 40 میل مشرق-جنوب مشرق میں اور ہیلی فیکس سے تقریباً 130 میل مغرب میں ہے، اور اگلے 2 دنوں میں کمزور ہونے کی توقع ہے۔
مزید پڑھیں
سمندری طوفان ایڈالیا فلوریڈا اور جارجیا سے جاٹکرایا،بجلی معطل، سکول بند ، پروازیں منسوخ
طوفان نے مائن کے ساحلی علاقوں اور اٹلانٹک کینیڈا کے کچھ حصوں میں تیز ہوائیں، سیلاب اور شدید بارشیں لائی ہیں۔کینیڈا کے صوبے نووا سکوشیا میں کل تقریباً 120,000 افراد بجلی سے محروم ہو گئے کیونکہ طوفان کی وجہ سے کئی درخت گر گئے اور بجلی کی تاریں ٹوٹ گئیں۔ مغربی علاقے کے کچھ حصوں میں 62 میل فی گھنٹہ سے زیادہ اور نووا سکوشیا کے سب سے بڑے شہر ہیلی فیکس میں 56 میل فی گھنٹہ سے زیادہ کی رفتار سے چلنے والی ہواؤں کے ساتھ ہیلی فیکس ہوائی اڈے کو تمام پروازوں کے لیے بند کر دیا گیا ہے۔نووا سکوشیا ایمرجنسی مینجمنٹ آفس کے ایگزیکٹیو ڈائریکٹر پال میسن نے کہا کہ طوفان کی شدت بہت زیادہ ہے، طوفان کی لہر شام کے اوائل تک اپنے بدترین ہونے کی توقع ہے۔
کینیڈین ہریکین سینٹر نے ایک بیان میں کہا کہ طوفان لی آج رات اٹلانٹک کے ساحل کے ساتھ بارش، تیز ہواؤں اور اونچی لہروں کے ساتھ خطے کو متاثر کرے گا۔امریکی صدر جو بائیڈن کی انتظامیہ نے مین اور میساچوسٹس کے لیے ہنگامی وارننگ جاری کی اور طوفان کے خدشے کے درمیان ریاستوں کو وفاقی امداد فراہم کی۔
