ishtiaq ahmed 
اردو ورلڈ کینیڈا ( ویب نیوز )پرویز الٰہی کو اپنی رہائش گاہ پر واپس آنے کی دعوت دیتا ہوں، رہائش گاہ کی ایک طرف میرا کمرہ ہے اور دوسری طرف پرویز الٰہی کا ہے۔ ان خیالات کا اظہار چوہدری شجاعت نے پریس کانفرنس میں کیا۔
چوہدری شجاعت نے کہا کہ بہت سی باتیں کرنی تھیں جن کے لیے میں یہاں آیا ہوں، سب کچھ ٹھیک ہے اور سب کچھ ٹھیک رہے گا۔
انہوں نے کہا کہ سچ بولنا گناہ بنتا جا رہا ہے، گندی زبان استعمال کی جاتی ہے، سچی زبان استعمال کی جائے، میرے بیٹوں کے بارے میں بات کی گئی اور انہیں بدنام کرنے کی کوشش کی گئی، لیکن بیٹوں نے ہر موقع پر مجھے سرخرو کیا اور مجھے اپنے بیٹوں پر فخر ہے۔
چوہدری شجاعت نے کہا کہ سیاستدانوں پر الزامات لگ رہے ہیں، معیشت کی تباہی کا الزام سیاستدانوں پر لگایا جا رہا ہے، سارے الزامات سیاستدانوں پر لگ رہے ہیں، آرمی چیف کو مداخلت کیوں کرنی پڑی۔ یہ سیاستدانوں کا قصور ہے کہ آرمی چیف کو مداخلت کرنا پڑی۔
ان کا مزید کہنا تھا کہ مجھے خوشی ہے کہ ہر کوئی ہمارے خاندان کی فکر میں ہے۔
سابق وزیراعظم نے کہا کہ میں اور طارق بشیر چیمہ اس وقت کے وزیراعظم عمران خان سے ملنے گئے تو انہوں نے کہا کہ مونس پر کرپشن کے الزامات ہیں۔
