اردو ورلڈ کینیڈا ( ویب نیوز ) سعودی عرب کے وزیر دفاع شہزادہ خالد بن سلمان اور کینیڈا کے وزیر دفاع ڈیوڈ میک نے جدہ میں اہم ملاقات کی ۔
دونوں ممالک کے دفاعی تعلقات، فوجی تعاون اور خطے کی مجموعی سکیورٹی صورتحال پر تفصیلی گفتگو کی گئی۔سرکاری ذرائع کے مطابق ملاقات کے دوران سعودی عرب اور کینیڈا کے درمیان دوطرفہ تعلقات کا جائزہ لیا گیا، جبکہ دفاعی شعبے میں تعاون کو مزید وسعت دینے اور مشترکہ مفادات کے فروغ کے مختلف پہلوؤں پر تبادلۂ خیال کیا گیا۔
دونوں وزرائے دفاع نے مشرقِ وسطیٰ سمیت خطے کی موجودہ صورتحال، علاقائی و بین الاقوامی سلامتی کو درپیش چیلنجز اور امن و استحکام کے فروغ کے لیے جاری کوششوں پر بھی اپنے خیالات کا اظہار کیا۔ اس موقع پر باہمی تعاون کو مزید مضبوط بنانے اور مشترکہ مفادات کے تحفظ کے عزم کا اعادہ بھی کیا گیا۔
ملاقات میں سعودی نائب وزیر دفاع شہزادہ عبدالرحمن بن محمد بن عیاف، چیف آف جنرل اسٹاف لیفٹیننٹ جنرل فیاض الرویلی اور دونوں ممالک کے دیگر اعلیٰ حکام بھی شریک تھے، جنہوں نے دفاعی امور اور دوطرفہ تعاون کے مختلف پہلوؤں پر تبادلۂ خیال کیا۔تجزیہ کاروں کے مطابق سعودی عرب اور کینیڈا کے اعلیٰ حکام کے حالیہ تبادلۂ ملاقاتیں دونوں ممالک کے درمیان دفاعی، سکیورٹی اور سفارتی روابط کو مزید مستحکم بنانے کی کوششوں کا حصہ ہیں۔
