اردوورلڈکینیڈا(ویب نیوز)کینیڈا سے تعلق رکھنے والے معروف گلوکار اور موسیقار پال انکا اور عالمی شہرت یافتہ میوزک پروڈیوسر ڈیوڈ فوسٹر کو 2026 کے کینیڈی سینٹر آنرز کے لیے نامزد کر دیا گیا ہے۔ دونوں فنکاروں کو موسیقی کی دنیا میں کئی دہائیوں پر محیط خدمات اور عالمی سطح پر نمایاں کامیابیوں کے اعتراف میں یہ اعزاز دیا جائے گا۔
پال انکا کا تعلق اوٹاوا سے ہے اور وہ تقریباً سات دہائیوں سے موسیقی کے شعبے میں سرگرم ہیں۔ ان کے مشہور گانوں میں ڈیانا، لونیلی بوائے اور پٹ یور ہیڈ آن مائی شولڈر شامل ہیں۔ انہوں نے فرینک سناترا کے مشہور گانے ’’مائی وے‘‘ کے انگریزی بول بھی تحریر کیے تھے، جو دنیا بھر میں بے حد مقبول ہوئے۔
دوسری جانب وکٹوریہ، برٹش کولمبیا سے تعلق رکھنے والے ڈیوڈ فوسٹر موسیقی کی صنعت میں بطور پروڈیوسر، کمپوزر اور موسیقار اپنی الگ پہچان رکھتے ہیں۔ وہ 16 مرتبہ گریمی ایوارڈ حاصل کر چکے ہیں اور انہوں نے وہٹنی ہیوسٹن، سیلین ڈیون، مائیکل ببلے اور دیگر عالمی شہرت یافتہ فنکاروں کے ساتھ کام کیا ہے۔
یہ بھی پڑھیں ؍کینیڈین اداکارہ میکنزی ڈیوس کی نئی نیٹ فلکس سیریز ’بیلو‘ کی دھوم، سمندری عفریت کے گرد گھومتی کہانی
پال انکا اور ڈیوڈ فوسٹر دونوں کینیڈین میوزک ہال آف فیم میں شامل ہیں اور انہیں آرڈر آف کینیڈا کا اعزاز بھی مل چکا ہے۔ دونوں فنکار 2026 کے کینیڈی سینٹر آنرز حاصل کرنے والے پہلے کینیڈین فنکار نہیں ہوں گے، تاہم اس سال دو کینیڈین شخصیات کا بیک وقت انتخاب ملک کی موسیقی کی عالمی اہمیت کو اجاگر کرتا ہے۔
کینیڈی سینٹر آنرز کی تقریب 7 دسمبر کو واشنگٹن کے کیپیٹل ون ایرینا میں منعقد ہوگی۔ اس سال تقریب روایتی کینیڈی سینٹر کی عمارت کے بجائے ایک دوسرے مقام پر ہوگی، جس کی وجہ ادارے سے متعلق قانونی تنازعات اور عمارت کی بندش بتائی گئی ہے۔
