اردوورلڈکینیڈا(ویب نیوز)کینیڈا کی وفاقی حکومت نے بجٹ 2026 میں بزرگ شہریوں کے لیے ریٹائرمنٹ بچت کے نظام میں اہم تبدیلی تجویز کردی ہے، جس کے تحت شہری 71 سال کی عمر مکمل ہونے کے بعد بھی اپنا رجسٹرڈ ریٹائرمنٹ سیونگ پلان (RRSP) برقرار رکھ سکیں گے۔ مجوزہ اقدام سے ہر سال ہزاروں بزرگ شہریوں کو مالی منصوبہ بندی اور ٹیکس سے متعلق انتظامی پیچیدگیوں سے نجات ملنے کی توقع ہے۔
کینیڈا میں RRSP ایک ایسا بچت اکاؤنٹ ہے جس میں جمع کرائی گئی رقم پر فوری ٹیکس کی چھوٹ ملتی ہے، جبکہ اس میں موجود سرمایہ کاری پر حاصل ہونے والی آمدن ریٹائرمنٹ تک ٹیکس سے مستثنیٰ رہتی ہے۔ اس اکاؤنٹ میں نقد رقم، شیئرز، گارنٹیڈ انویسٹمنٹ سرٹیفکیٹس اور ایکسچینج ٹریڈڈ فنڈز سمیت مختلف مالی اثاثے رکھے جا سکتے ہیں۔
موجودہ نظام میں کیا تبدیلی آئے گی؟
موجودہ قوانین کے تحت کینیڈین شہریوں کو 71 سال کی عمر مکمل ہونے پر اپنا RRSP اکاؤنٹ ختم کرکے رقم نکالنا یا اسے رجسٹرڈ ریٹائرمنٹ انکم فنڈ (RRIF) میں تبدیل کرنا لازمی ہوتا ہے۔ حکومت کی نئی تجویز کے مطابق شہریوں کو یہ پابندی ختم کرکے زندگی بھر RRSP برقرار رکھنے کی اجازت دی جائے گی۔
اس تبدیلی کا ایک اہم پہلو یہ بھی ہے کہ اکاؤنٹ ہولڈر کی وفات کے بعد اس کا شریک حیات یا پارٹنر RRSP کا جانشین اکاؤنٹ ہولڈر بن سکے گا، جس سے رقم کی ٹیکس فری منتقلی اور ضروری قانونی و انتظامی کارروائی آسان ہوجائے گی۔
72 سال کی عمر سے رقم نکلوانا لازمی ہوگا
مجوزہ نظام کے تحت RRSP برقرار رکھنے کی اجازت کے باوجود اکاؤنٹ ہولڈرز کو 72 سال کی عمر سے ہر سال اپنی بچت کا ایک کم از کم مقررہ حصہ نکلوانا ہوگا۔ اس شرح کا تعین اوسط متوقع عمر کو مدنظر رکھتے ہوئے کیا جائے گا تاکہ ریٹائرمنٹ کی جمع پونجی مرحلہ وار نکالی جائے اور اس پر متعلقہ ٹیکس بھی ادا ہوتا رہے۔
کینیڈا کے وزیر خزانہ فرانسوا فلپ شمپین کے پریس سیکریٹری جان فراگوس نے تصدیق کی ہے کہ نئے نظام کے تحت 71 سال کی عمر کے بعد شہری اپنے RRSP میں مزید رقم جمع نہیں کرا سکیں گے۔
ماہرین کی رائے اور عام شہریوں کے مسائل
CIBC پرائیویٹ ویلتھ مینجمنٹ کے ٹیکس اور اسٹیٹ پلاننگ کے مینیجنگ ڈائریکٹر جیمی گولومبیک کے مطابق اس وقت زیادہ تر 71 سالہ شہری ٹیکس کی اضافی ادائیگی سے بچنے کے لیے اپنا RRSP اکاؤنٹ RRIF میں تبدیل کرتے ہیں، تاہم یہ عمل ہر سال لاکھوں شہریوں کے لیے انتظامی پیچیدگیاں پیدا کرتا ہے۔
یہ بھی پڑھیں :مونٹریال کی تاریخی کینیڈا مالٹنگ عمارت کسی بھی وقت گر سکتی ہے، ہنگامی انہدام کی تجویز
ماہرین کا کہنا ہے کہ مجوزہ تبدیلی سے بزرگ شہریوں کی مالی منصوبہ بندی آسان ہوگی، تاہم یہ اقدام مہنگائی، رہائشی اخراجات اور روزمرہ ضروریات کی بڑھتی ہوئی قیمتوں سے پریشان بزرگ شہریوں کے مالی مسائل کا براہ راست حل فراہم نہیں کرتا۔
حکومت نے اس منصوبے پر عوامی مشاورت کا آغاز 5 نومبر سے کردیا ہے، جو 8 جنوری 2027 تک جاری رہے گی۔ اس دوران شہریوں اور متعلقہ ماہرین سے تجاویز طلب کی جائیں گی۔
ٹیکس سال 2026 میں RRSP کی حد
2026 کے ٹیکس سال کے لیے شہری اپنی 2025 کی کمائی کا 18 فیصد یا زیادہ سے زیادہ 33 ہزار 810 کینیڈین ڈالر RRSP میں جمع کرا سکتے ہیں۔ تاہم ملازمت کے دوران حاصل ہونے والی پنشن کی مالیت اس حد سے منہا کی جاتی ہے۔
