اردورلڈکینیڈا(ویب نیوز)جشنِ آزادی میں صرف ایک روز باقی رہ گیا ہے اور پاکستان بھر میں یومِ آزادی کی تیاریاں اپنے عروج پر پہنچ گئی ہیں۔ ملک کے بڑے شہروں سے لے کر چھوٹے قصبوں تک ہر طرف سبز ہلالی پرچموں، جھنڈیوں اور قومی رنگوں کی بہار نظر آرہی ہے، جبکہ شہری 14 اگست کو بھرپور جوش و جذبے کے ساتھ منانے کے لیے تیاریوں میں مصروف ہیں۔

14 اگست پاکستان کی آزادی کا دن ہے اور اس موقع پر ہر پاکستانی کی خواہش ہوتی ہے کہ وطن عزیز کی آزادی کی خوشی بھرپور انداز میں منائی جائے۔ اسی جذبے کے تحت شہریوں نے اپنے گھروں، دکانوں، گاڑیوں اور کاروباری مراکز کو قومی پرچم اور سبز ہلالی رنگوں سے سجانا شروع کردیا ہے۔

سرکاری عمارتیں جگمگا اٹھیں

اسلام آباد میں پارلیمنٹ ہاؤس سمیت اہم سرکاری عمارتوں کو خوبصورت اور رنگ برنگی روشنیوں سے سجا دیا گیا ہے۔ رات کے وقت روشن عمارتیں جشنِ آزادی کی خوشیوں کو مزید نمایاں کررہی ہیں۔

ملک کے دیگر شہروں میں بھی سرکاری عمارتوں، چوکوں، شاہراہوں اور اہم مقامات پر قومی پرچم اور سبز و سفید رنگوں کی آرائش کی گئی ہے۔

شہریوں نے گھروں کی چھتوں، بالکونیوں اور عمارتوں پر بھی سبز ہلالی پرچم لہرا دیے ہیں، جس کے باعث مختلف علاقوں میں دور دور تک قومی پرچم لہراتے دکھائی دے رہے ہیں۔

بازاروں میں گہما گہمی

جشنِ آزادی کے لیے سجائے گئے عارضی بازاروں اور اسٹالز پر شہریوں کا رش بڑھ گیا ہے۔ بڑے افراد کے ساتھ بچوں کی بڑی تعداد بھی خریداری کے لیے بازاروں کا رخ کررہی ہے۔

دکانداروں نے مختلف سائز کے قومی پرچم، جھنڈیاں، بیجز، ٹوپیاں، ماسک، گھڑیاں اور دیگر آرائشی اشیا اسٹالز پر سجا رکھی ہیں۔

کسی شہری کو اپنی گاڑی کے لیے بڑا قومی پرچم درکار ہے تو کوئی موٹرسائیکل کو سبز ہلالی جھنڈیوں سے سجانے میں مصروف ہے۔ کئی خاندان اپنے گھروں کی سجاوٹ کے لیے بڑے پرچم اور چھوٹی جھنڈیاں خرید رہے ہیں۔

بچوں کی پسند الگ

جشنِ آزادی کی خریداری میں سب سے زیادہ جوش بچوں میں نظر آرہا ہے۔ سبز اور سفید رنگ کے ملبوسات، چاند تارے والی شرٹس، ٹوپیاں، ماسک اور بیجز ننھے پاکستانیوں کی خاص توجہ کا مرکز بنے ہوئے ہیں۔

یہ بھی پڑھیں :یومِ آزادی پر قومی قیادت کا عزمِ نو،اتحاد،قربانی اور ترقی کا پیغام

بچیاں سبز اور سفید رنگ کی فراکس، چوڑیاں، جیولری اور دیگر اشیا خریدنے میں مصروف ہیں جبکہ بچے چاند تارے والی شرٹس، سبز ٹوپیاں اور قومی پرچم والی مختلف اشیا پسند کررہے ہیں۔

کئی بچوں کا کہنا ہے کہ وہ 14 اگست کو سبز اور سفید لباس پہنیں گے، قومی پرچم لہرائیں گے اور اپنے دوستوں کے ساتھ جشنِ آزادی بھرپور انداز میں منائیں گے۔

خواتین بھی پرجوش

جشنِ آزادی کی خریداری میں خواتین اور بچیاں بھی خاص دلچسپی لے رہی ہیں۔ بازاروں میں سبز ہلالی رنگ کی چوڑیوں، دوپٹوں، جیولری اور دیگر لوازمات کی طلب میں اضافہ ہوگیا ہے۔

خواتین اپنے بچوں کے لیے سبز و سفید ملبوسات خریدنے کے ساتھ ساتھ خود بھی یومِ آزادی کے رنگوں سے ہم آہنگ لباس اور جیولری خرید رہی ہیں۔

والدین کا اہم کردار

والدین صرف بچوں کو خریداری کرانے تک محدود نہیں بلکہ انہیں یومِ آزادی کی اہمیت اور پاکستان کی آزادی کی جدوجہد کے بارے میں بھی آگاہ کررہے ہیں۔

والدین کا کہنا ہے کہ بچوں کو جشن کی خوشیوں میں شریک کرنے کا مقصد صرف تفریح نہیں بلکہ ان کے دلوں میں وطن سے محبت اور قومی ذمہ داری کا احساس پیدا کرنا بھی ہے۔

ان کے مطابق بچوں کو یہ سمجھانا ضروری ہے کہ 14 اگست صرف جھنڈیاں لگانے یا نئے کپڑے پہننے کا دن نہیں بلکہ یہ آزادی کی قدر کرنے اور ملک کی ترقی میں اپنا کردار ادا کرنے کے عزم کی تجدید کا موقع بھی ہے۔

دکانداروں کی چاندی

جشنِ آزادی کی تیاریاں شہریوں کے ساتھ ساتھ عارضی اسٹالز لگانے والے دکانداروں کے لیے بھی خوشی کا باعث بن گئی ہیں۔ مختلف علاقوں میں خصوصی اسٹالز سج گئے ہیں جہاں قومی پرچم اور جشنِ آزادی سے متعلق اشیا کی فروخت جاری ہے۔

دکانداروں کے مطابق 14 اگست سے ایک روز قبل خریداری میں نمایاں اضافہ ہوگیا ہے اور بچوں سے لے کر بڑوں تک ہر عمر کے افراد قومی رنگوں سے متعلق اشیا خرید رہے ہیں۔

کئی دکانداروں نے بتایا کہ صبح سے رات تک اسٹالز پر گاہکوں کا رش رہتا ہے، جبکہ قومی پرچم، جھنڈیوں، بیجز اور بچوں کے ملبوسات کی مانگ سب سے زیادہ ہے۔

ہر طرف سبز ہلالی پرچم

جشنِ آزادی کی آمد کے ساتھ پاکستان کے مختلف شہروں میں ایک خوبصورت منظر دیکھنے کو مل رہا ہے۔ شاہراہوں، بازاروں، گھروں، گاڑیوں اور سرکاری عمارتوں پر لہراتے سبز ہلالی پرچم قومی یکجہتی اور وطن سے محبت کی علامت بن گئے ہیں۔

ایک طرف شہری 14 اگست کی خوشیاں منانے کے لیے آخری تیاریاں مکمل کررہے ہیں تو دوسری جانب بچوں میں جشنِ آزادی کے حوالے سے خاصا جوش و خروش پایا جارہا ہے۔