اردوورلڈکینیڈا(ویب نیوز)کینیڈا کے صوبہ اونٹاریو کے وزیرِ سیاحت، ثقافت اور گیمنگ اسٹین چو نے سرکاری خرچ پر ہوٹل کے اخراجات کے تنازع کے بعد اپنی کابینہ سے استعفیٰ دے دیا ہے۔
پریمیئر ڈگ فورڈ نے جمعہ کو جاری بیان میں کہا کہ انہوں نے اسٹین چو کا استعفیٰ فوری طور پر قبول کر لیا ہے۔ ان کے مطابق اسٹین چو نے اپنی غلطی کا اعتراف کرتے ہوئے اس کی ذمہ داری قبول کی ہے، تاہم وہ بدستور ولوڈیل کے منتخب رکنِ صوبائی اسمبلی کے طور پر اپنی ذمہ داریاں انجام دیتے رہیں گے۔
اسٹین چو پر الزام تھا کہ انہوں نے 2023 سے اب تک ٹورنٹو میں ہوٹل قیام کے لیے سرکاری خزانے سے 16 ہزار کینیڈین ڈالر سے زائد کے اخراجات وصول کیے۔سماجی رابطے کی ویب سائٹ پر جاری اپنے بیان میں اسٹین چو نے کہا کہ انہوں نے یہ تمام رقم واپس ادا کر دی ہے۔
انہوں نے کہا کہ گزشتہ تین برسوں کے دوران انہوں نے ان راتوں کے قیام کے اخراجات وصول کیے جب صوبائی اسمبلی کے اجلاس دیر تک جاری رہتے تھے۔ ان کے بقول انہوں نے اپنے تمام اخراجات کا دوبارہ جائزہ لیا ہے اور وہ سمجھتے ہیں کہ یہ اسمبلی کے قواعد کے مطابق تھے۔
تاہم انہوں نے اعتراف کیا کہ اب ماضی پر نظر ڈالنے سے محسوس ہوتا ہے کہ ان سے غلطی ہوئی، جس کی وہ مکمل ذمہ داری قبول کرتے ہیں کیونکہ وہ حکومت کے معاشی ترقی، عوامی تحفظ اور صوبے کی تعمیر کے منصوبوں میں رکاوٹ نہیں بننا چاہتے۔
پریمیئر ڈگ فورڈ نے اعلان کیا کہ رکنِ صوبائی اسمبلی ڈگ ڈاؤنی کو عبوری طور پر اسٹین چو کی وزارت کی اضافی ذمہ داریاں سونپ دی گئی ہیں۔
سرکاری اخراجات کے دستیاب ریکارڈ کے مطابق 2023 سے اونٹاریو کابینہ کے بعض وزراء اور ٹورنٹو یا اس کے قریبی علاقوں سے تعلق رکھنے والے حکومتی ارکان خصوصی قواعد کے تحت ٹورنٹو میں ہوٹل قیام کے اخراجات وصول کرتے رہے ہیں۔
اگرچہ اسٹین چو نے سب سے زیادہ اخراجات وصول نہیں کیے، تاہم ان کا حلقہ اسمبلی کی عمارت کے دیگر وزراء کے مقابلے میں زیادہ قریب واقع ہے۔ایک الگ پریس کانفرنس میں پریمیئر ڈگ فورڈ نے کہا کہ ایسے اخراجات ناقابل قبول ہیں اور حکومت مالی معاملات میں ذمہ داری اور احتیاط کی پالیسی پر عمل پیرا ہے۔
انہوں نے کہا کہ اسٹین چو نے استعفیٰ دے کر درست فیصلہ کیا ہے، جبکہ حکومت نے اپنی پوری جماعت کو واضح کر دیا ہے کہ اس نوعیت کے اخراجات ہرگز برداشت نہیں کیے جائیں گے۔
