اردو ورلڈ کینیڈا ( ویب نیوز ) پاکستان سپر لیگ سیزن 11 کا فائنل آج لاہور کے قذافی اسٹیڈیم میں کھیلا جا رہا ہے، جس میں پشاور زلمی اور حیدرآباد کنگز مین کی ٹیمیں ٹرافی کے لیے مدِمقابل ہوں گی۔
فائنل سے قبل اسٹیڈیم میں رنگا رنگ اختتامی تقریب بھی منعقد کی جائے گی، جس میں ملک کے نامور فنکار اپنی پرفارمنس پیش کریں گے۔ ان میں عاطف اسلم، علی ظفر، آئمہ بیگ اور صابری سسٹرز شامل ہیں۔پشاور زلمی کے کپتان بابر اعظم نے کہا ہے کہ ہر کپتان کی خواہش ہوتی ہے کہ وہ ٹرافی جیتے اور ان کی ٹیم بھی اسی ہدف کے ساتھ میدان میں اترے گی۔
دوسری جانب حیدرآباد کنگز مین کے کپتان مارنش لبوشین نے کہا ہے کہ ٹیم سخت مقابلوں کے بعد فائنل تک پہنچی ہے اور وہ اپنی بہترین کارکردگی دکھانے کے لیے پرعزم ہیں۔چیئرمین پی سی بی محسن نقوی کی زیر صدارت اجلاس میں فائنل کے انتظامات کا تفصیلی جائزہ لیا گیا، جس میں شائقین کے لیے سہولتوں اور سیکیورٹی انتظامات کو مزید بہتر بنانے کی ہدایت دی گئی۔انہوں نے شائقین کو ہدایت کی ہے کہ وہ شام 6 بجے تک اسٹیڈیم پہنچ جائیں تاکہ افتتاحی اور اختتامی تقریبات سے بھرپور لطف اٹھا سکیں۔فائنل میچ کی براہ راست نشریات مختلف چینلز پر نشر کی جائیں گی۔
