پاکستان کے سابق وزیراعظم عمران خان اور ان کی سابقہ اہلیہ جمائمہ خان کی رہائش گاہ رہنے والا لندن کا تاریخی گھر فروخت کے لیے پیش کر دیا گیا ہے۔
غیر ملکی میڈیا رپورٹس کے مطابق اس جائیداد کی قیمت 2 کروڑ 50 لاکھ برطانوی پاؤنڈ (25 ملین پاؤنڈ) مقرر کی گئی ہے۔رپورٹس کے مطابق "اورملی لاج” (Ormeley Lodge) نامی یہ تاریخی اور پرتعیش رہائش گاہ جنوب مغربی لندن کے علاقے رچمنڈ میں ہیم کامن کے قریب واقع ہے، جبکہ مشہور رچمنڈ پارک بھی اس کے نزدیک موجود ہے۔جارجین دور کے ابتدائی زمانے میں تعمیر ہونے والی اس عمارت کا مجموعی رقبہ تقریباً 15 ہزار 814 مربع فٹ ہے۔ اس میں 10 بیڈ رومز، 7 باتھ رومز، وسیع باغات اور ایک علیحدہ کاٹیج بھی شامل ہے۔
یہ رہائش گاہ اس حوالے سے بھی اہم سمجھی جاتی ہے کہ عمران خان نے جمائمہ خان کے ساتھ ازدواجی زندگی کے دوران اور بعد ازاں طلاق کے بعد بھی کئی برس یہاں قیام کیا۔ اس عرصے میں وہ اپنی سابقہ ساس لیڈی اینابیل گولڈ اسمتھ کے ساتھ بھی اسی گھر میں مقیم رہے۔جائیداد فروخت کے لیے پیش کیے جانے کے بعد یہ گھر ایک بار پھر عالمی میڈیا اور پاکستانی حلقوں کی توجہ کا مرکز بن گیا ہے، کیونکہ اسے عمران خان کی ذاتی زندگی سے وابستہ اہم رہائش گاہوں میں شمار کیا جاتا ہے۔
