Irfan 
ملک کے بیشتر علاقوں میں آئندہ 4 سے 5 روز میں دن کے درجہ حرارت میں اضافے کا امکان ہے، جس کے لیے محکمہ موسمیات نے الرٹ جاری کر دیا ہے۔
محکمہ موسمیات کے مطابق آئندہ چار سے پانچ روز کے دوران اسلام آباد، پنجاب، خیبرپختونخوا، کشمیر، سندھ اور مشرقی بلوچستان میں دن کا درجہ حرارت معمول سے زیادہ رہنے کا امکان ہے۔
گرمی میں غیر معمولی اضافے کے پیش نظر محکمہ موسمیات نے الرٹ جاری کرتے ہوئے کہا ہے کہ شہری غیر ضروری طور پر دھوپ میں نکلنے سے گریز کریں اور ہیٹ اسٹروک سے بچاؤ کے لیے احتیاطی تدابیر اختیار کریں۔
محکمہ موسمیات کے حکام کا کہنا ہے کہ شدید گرمی کی لہر کے بعد ملک کے بالائی اور وسطی علاقوں میں بارشیں داخل ہونے کا امکان ہے جس سے گرمی کی شدت میں کمی آئے گی۔
دوسری جانب این ڈی ایم اے نے صوبائی اور ضلعی ڈیزاسٹر مینجمنٹ حکام اور دیگر متعلقہ محکموں کو ہدایت کی ہے کہ وہ کسی بھی ممکنہ ہنگامی صورتحال سے نمٹنے کے لیے تیار رہیں۔
