اردوورلڈکینیڈا( ویب نیوز)پاک فوج کے شعبۂ تعلقاتِ عامہ (آئی ایس پی آر) کے مطابق پاکستان اور افغانستان کی سرحد سے ملحقہ علاقوں میں انٹیلی جنس اطلاعات کی بنیاد پر کی جانے والی کارروائیوں میں مجموعی طور پر 29 دہشت گرد مارے گئے ہیں۔
آئی ایس پی آر کی جانب سے جاری بیان میں کہا گیا ہے کہ آپریشن "غضب للحق” کے تحت باجوڑ میں کی گئی ایک کارروائی کے دوران چار دہشت گرد ہلاک ہوئے۔ فوج کے مطابق مارے جانے والوں میں خان فروش عرف زبل نامی ایک اہم کمانڈر بھی شامل ہے، جبکہ دیگر تین افراد کا تعلق جماعت الاحرار سے بتایا گیا ہے۔
بیان میں مزید کہا گیا ہے کہ جماعت الاحرار اور فتنہ الخوارج سے وابستہ عناصر کے خلاف پکتیا، پکتیکا اور کنڑ کے علاقوں میں بھی کارروائیاں کی گئیں۔ ان کارروائیوں کے دوران تین مبینہ دہشت گرد ٹھکانے تباہ کیے گئے، جبکہ 25 مزید دہشت گرد ہلاک اور متعدد زخمی ہوئے۔فوج کے مطابق کارروائیوں کے دوران دہشت گردوں کے زیرِ استعمال اسلحہ اور دھماکا خیز مواد کے ذخائر بھی تباہ کر دیے گئے۔
آئی ایس پی آر نے اپنے بیان میں کہا کہ خیبرپختونخوا، بلوچستان اور کراچی میں ہونے والے دہشت گرد حملوں کا بھرپور جواب دیا جا رہا ہے۔ فوج نے اس عزم کا اعادہ کیا کہ بیرونی سرپرستی میں ہونے والی دہشت گردی کے مکمل خاتمے کے لیے کارروائیاں جاری رہیں گی۔
