اردو ورلڈ کینیڈا ( ویب نیوز ) جرمنی کے شمالی علاقے میں فائرنگ کے ایک افسوسناک واقعے میں پانچ افراد ہلاک ہو گئے، جبکہ پولیس نے کارروائی کرتے ہوئے ایک مشتبہ شخص کو حراست میں لے لیا ہے۔
حکام کے مطابق واقعے کی وجوہات اور حملہ آور کے محرکات کا ابھی تک تعین نہیں ہو سکا، تاہم مختلف پہلوؤں سے تحقیقات جاری ہیں۔میڈیا رپورٹس کے مطابق فائرنگ کا واقعہ اسٹیڈ کے مرکزی علاقے میں پیش آیا، جو ہیمبرگ سے تقریباً 40 کلومیٹر مغرب میں واقع ایک نسبتاً چھوٹا قصبہ ہے، جہاں آبادی 50 ہزار سے بھی کم ہے۔
فائرنگ کے نتیجے میں پانچ افراد موقع پر ہی ہلاک ہو گئے، جس کے بعد علاقے میں خوف و ہراس پھیل گیا اور پولیس کی بھاری نفری نے جائے وقوعہ کو گھیرے میں لے لیا۔پولیس حکام نے بتایا کہ فائرنگ کے شبہے میں ایک شخص کو گرفتار کر لیا گیا ہے، تاہم ابھی یہ واضح نہیں کیا گیا کہ آیا وہ اکیلا حملہ آور تھا یا اس کے ساتھ دیگر افراد بھی ملوث تھے۔
بعض مقامی میڈیا رپورٹس میں متعدد مشتبہ افراد کا ذکر کیا گیا ہے، لیکن پولیس نے ان اطلاعات کی باضابطہ تصدیق نہیں کی۔تحقیقاتی حکام کا کہنا ہے کہ واقعے کے پس منظر، حملہ آور کے ممکنہ محرکات اور متاثرین کی شناخت سے متعلق معلومات اکٹھی کی جا رہی ہیں۔
پولیس نے شہریوں سے اپیل کی ہے کہ وہ افواہوں پر کان نہ دھریں اور صرف سرکاری ذرائع سے جاری ہونے والی معلومات پر اعتماد کریں۔ واقعے کی مکمل تحقیقات جاری ہیں اور حکام نے یقین دہانی کرائی ہے کہ تمام حقائق سامنے لانے کے لیے ہر ممکن اقدامات کیے جا رہے ہیں۔
