208
اردو ورلڈ کینیڈا ( ویب نیوز )وزیر اعظم شہباز شریف نے کہا ہے کہ ہر سال 5 فروری کو پاکستانی عوام اپنے کشمیری بھائیوں اور بہنوں کے ساتھ یکجہتی کا اعادہ کرتے ہیں۔ گزشتہ 75 سالوں سے بھارت نے جموں و کشمیر پر اپنا ناجائز قبضہ جاری رکھا ہوا ہے۔ .
یوم یکجہتی کشمیر کے موقع پر اپنے پیغام میں وزیر اعظم شہباز شریف نے کہا کہ اگست 2019 کے بھارتی غیر قانونی اقدامات کے بعد مقبوضہ کشمیر کی صورتحال نے بدترین رخ اختیار کر لیا ہے۔
انہوں نے کہا کہ بھارت کے غیر قانونی اور یک طرفہ اقدامات کو پاکستانی اور کشمیری یکسر مسترد کرتے ہیں۔ مقبوضہ کشمیر میں انسانی حقوق کی صورتحال پاکستان اور دنیا کے لیے تشویشناک ہے۔
شہباز شریف نے کہا کہ بھارتی اقدامات عالمی قوانین کی خلاف ورزی ہیں ہم کشمیریوں کے ساتھ کھڑے ہیں، عالمی فورمز پر بھارتی وحشیانہ اقدامات کو اجاگر کرتے رہیں گے۔
وزیراعظم نے مزید کہا کہ بھارت پاکستان، اقوام متحدہ اور کشمیری عوام سے کیے گئے وعدوں کی پاسداری کرے۔
