اردوورلڈکینیڈا(ویب نیوز)پاکستان شوبز انڈسٹری کی معروف اداکارہ مومنہ اقبال کے نکاح سے متعلق زیرِ گردش خبروں میں اس وقت اہم پیشرفت سامنے آئی ہے جب ان کے منگیتر حمزہ حبیب نے نکاح کی تصدیق کر دی۔
لاہور ہائی کورٹ میں پیشی کے موقع پر ذرائع ابلاغ سے گفتگو کرتے ہوئے حمزہ حبیب نے بتایا کہ دو روز قبل ان کا نکاح ہو چکا ہے اور مومنہ اقبال اب ان کی قانونی اہلیہ ہیں۔ ان کا کہنا تھا کہ وہ اپنی اہلیہ کی عزت اور تحفظ کے لیے ہر ممکن اقدام کریں گے۔
دوسری جانب لاہور ہائی کورٹ نے حمزہ حبیب کی حفاظتی ضمانت منظور کرتے ہوئے انہیں یکم جون تک متعلقہ عدالت سے رجوع کرنے کی ہدایت جاری کی ہے۔ ان کے خلاف جھنگ پولیس نے ایک شخص ثاقب چڈھر کی شکایت پر مبینہ دھمکیوں کے الزام میں مقدمہ درج کر رکھا ہے۔
عدالت کے باہر گفتگو کرتے ہوئے حمزہ حبیب نے مقدمے کو سیاسی نوعیت کا اور بے بنیاد قرار دیا۔ انہوں نے دعویٰ کیا کہ ان پر دباؤ ڈالنے کی کوشش کی گئی اور یہ بھی کہا کہ ثاقب چڈھر نے ان سے رابطہ کر کے مومنہ اقبال سے علیحدگی کے بدلے مالی فائدے کی پیشکش کی۔
حمزہ حبیب نے جذباتی انداز میں کہا کہ مومنہ ان کی عزت ہیں اور وہ ان کی اہلیہ ہیں۔ ان کے اس بیان کے بعد سوشل ذرائع ابلاغ پر مداحوں کی جانب سے نئی جوڑی کے لیے نیک خواہشات اور مختلف تبصروں کا سلسلہ بھی شروع ہو گیا۔
