اردوورلڈکینیڈا(ویب نیوز)کینیڈا کے شہر کیلگری میں ایک دفاعی وکیل کے خلاف کم عمر بچوں کے جنسی استحصال اور بچوں کو ورغلانے سمیت متعدد سنگین مقدمات درج کرلیے گئے ہیں۔
البرٹا لا انفورسمنٹ رسپانس ٹیمز کے مطابق چھیالیس سالہ جارڈن بونر کو تیس اپریل کو ادارے کے انٹرنیٹ بچوں کے استحصال سے نمٹنے والے شعبے اور کیلگری پولیس سروس نے مشترکہ کارروائی کے دوران گرفتار کیا۔
تحقیقات کے دوران ملزم کے گھر اور قانونی دفتر کی تلاشی بھی لی گئی۔ حکام کے مطابق ملزم نے سماجی رابطے کی ایپ سنیپ چیٹ کے ذریعے کئی کم عمر بچوں سے مبینہ طور پر فحش گفتگو کی اور بچوں کے استحصال سے متعلق مواد بھی شیئر کیا۔
پولیس کا کہنا ہے کہ ملزم مختلف فرضی نام استعمال کرتا تھا۔ تحقیقات کے مطابق متاثرہ بچوں کی عمریں گیارہ سے پندرہ برس کے درمیان ہیں۔
حکام کے مطابق یہ مبینہ جرائم دسمبر دو ہزار پچیس میں پیش آئے جبکہ رائل کینیڈین ماونٹڈ پولیس کی جانب سے بھیجے گئے تحقیقاتی حوالہ کے مطابق ملزم کو تقریباً نو مختلف الزامات کا سامنا ہے، جن میں بچوں کو انٹرنیٹ کے ذریعے ورغلانا، جنسی استحصال اور قابل اعتراض مواد کی ترسیل شامل ہے۔
