اردو ورلڈ کینیڈا ( ویب نیوز ) کینیڈا کے مغربی صوبوں کے وزرائے اعلیٰ کے اجلاس میں فرسٹ نیشنز سے مشاورت کے معاملے پر اختلاف کھل کر سامنے آگیا ۔
مینیٹوبا کے پریمئر نے البرٹا کی پریمئر کے مؤقف کو غلط قرار دے دیا۔ یہ صورتحال اس وقت پیدا ہوئی جب البرٹا کے پہاڑی علاقے کاناناسکس میں منعقدہ اجلاس کے اختتام پر پریس کانفرنس کے دوران مقامی آبادیوں کے معاہداتی حقوق سے متعلق سوال پوچھا گیا۔اجلاس میں شریک پریمئر بظاہر اتحاد اور تعاون کا پیغام دینے کی کوشش کرتے رہے، تاہم اختتامی پریس کانفرنس میں ماحول اس وقت کشیدہ ہوگیا جب صحافیوں نے پوچھا کہ ایسے فیصلوں میں حکومتوں پر فرسٹ نیشنز سے مشاورت کی کیا ذمہ داری عائد ہوتی ہے جو ان کے معاہداتی حقوق کو متاثر کرسکتے ہوں۔
البرٹا کی پریمئر ڈینیئل اسمتھ نے اس حوالے سے اپنا مؤقف پیش کیا تو مینیٹوبا کے پریمئر واب کینو نے فوراً مداخلت کرتے ہوئے کہا کہ یہ بات درست نہیں۔
انہوں نے واضح کیا کہ کینیڈا کے آئین اور عدالتی فیصلوں کے تحت حکومتیں اس بات کی پابند ہیں کہ وہ مقامی آبادیوں سے بامعنی مشاورت کریں، خاص طور پر ایسے معاملات میں جن کا تعلق زمین، وسائل یا معاہداتی حقوق سے ہو۔واب کینو نے زور دیا کہ فرسٹ نیشنز کو نظر انداز کرکے کیے گئے فیصلے نہ صرف قانونی تنازعات کو جنم دے سکتے ہیں بلکہ حکومتوں اور مقامی برادریوں کے درمیان اعتماد کو بھی نقصان پہنچا سکتے ہیں۔
ان کا کہنا تھا کہ مقامی آبادیوں کے حقوق کا احترام قومی مفاد میں ہے اور اس حوالے سے کسی قسم کی غلط فہمی پیدا نہیں ہونی چاہیے۔دوسری جانب ڈینیئل اسمتھ نے صوبائی خودمختاری اور وسائل سے متعلق معاملات میں صوبوں کے اختیارات پر زور دیا، تاہم ان کے بیان پر فوری اختلاف نے اجلاس کے دوران موجود اختلافات کو نمایاں کردیا۔ سیاسی مبصرین کے مطابق توانائی منصوبوں، قدرتی وسائل اور مقامی آبادیوں کے حقوق کے معاملات آنے والے دنوں میں وفاقی اور صوبائی حکومتوں کے درمیان مزید بحث اور کشیدگی کا باعث بن سکتے ہیں۔
