اردوورلڈکینیڈا(ویب نیوز)نائب وزیرِاعظم اور وزیرِ خارجہ اسحاق ڈار نے مصر اور کینیڈا کے وزرائے خارجہ سے الگ الگ ٹیلیفونک رابطے کیے ہیں جن میں خطے کی موجودہ صورتحال پر تفصیلی گفتگو ہوئی۔

وزارتِ خارجہ کے مطابق ان رابطوں کے دوران علاقائی حالات اور جاری سفارتی کوششوں پر تبادلہ خیال کیا گیا۔ دونوں فریقین نے ایران اور امریکا کے درمیان ہونے والے مذاکراتی عمل کی کامیابی کے لیے نیک خواہشات کا اظہار کیا۔

کینیڈا کی وزیرِ خارجہ کے ساتھ گفتگو میں پاکستان کی جانب سے خطے میں امن و استحکام کے لیے کی جانے والی سفارتی کوششوں کو سراہا گیا۔ انہوں نے کہا کہ پاکستان کا کردار موجودہ صورتحال میں اہمیت رکھتا ہے۔

اسحاق ڈار نے دونوں رہنماؤں کو پاکستان کے مؤقف اور علاقائی امن کے لیے جاری کوششوں سے آگاہ کیا اور اس عزم کا اعادہ کیا کہ پاکستان خطے میں کشیدگی کم کرنے اور سفارتی حل کو فروغ دینے کے لیے اپنا کردار جاری رکھے گا۔

یہ رابطے ایسے وقت میں ہوئے ہیں جب خطے میں سفارتی سرگرمیوں میں تیزی دیکھی جا رہی ہے اور مختلف ممالک کے درمیان رابطے بڑھ رہے ہیں۔