ishtiaq ahmed 
اردو ورلڈ کینیڈا ( ویب نیوز )بجلی مزید مہنگی کرنے کی تیاری، وفاقی حکومت نے نیپرا کو بجلی کے بنیادی نرخوں میں 7 روپے 91 پیسے اضافے کی درخواست دائر کردی۔
وفاقی حکومت نے نیپرا کو یکساں ٹیرف کی درخواست جمع کرادی ہے جس پر کل سماعت کے بعد نیپرا اپنا فیصلہ وفاقی حکومت کو نوٹیفکیشن کے لیے بھیجے گی۔
وفاقی حکومت کی جانب سے دائر درخواست میں کے الیکٹرک سمیت تمام ڈسکوز کے لیے بجلی کے بنیادی ٹیرف میں اضافے کی تجویز ہے۔ حکومت بجلی کے بنیادی نرخوں میں مرحلہ وار اضافہ کرنے کا ارادہ رکھتی ہے۔ اس سلسلے میں جولائی سے بجلی کی قیمت میں 3 روپے 50 پیسے فی یونٹ اضافے کی تجویز ہے۔
اگست سے بجلی کی قیمت میں 3 روپے 50 پیسے فی یونٹ اضافہ کیا جائے گا جب کہ اکتوبر سے بجلی کے بنیادی نرخوں میں 91 پیسے فی یونٹ اضافہ کیا جائے گا۔ اس سے قبل نیپرا نے بجلی کے بنیادی نرخوں میں اضافے کا فیصلہ وفاقی حکومت کو بھجوایا تھا جس کے بعد اب حکومت نے یکساں ٹیرف کے لیے نیپرا کو درخواست جمع کرادی ہے۔
ادھر وفاقی وزیر اطلاعات مریم اورنگزیب نے بجلی کی قیمتوں میں اضافے کی تردید کرتے ہوئے کہا کہ بجلی کی قیمتوں میں اضافے سے متعلق خبروں میں کوئی صداقت نہیں۔
