اردوورلڈکینیڈا(ویب نیوز)چیف آف ڈیفنس فورسز عاصم منیر نے کہا ہے کہ پراپیگنڈا، جعلی خبروں اور بیرونی سرپرستی میں ہونے والی دہشت گردی پاکستان کی ترقی کا راستہ نہیں روک سکتی۔

آئی ایس پی آر کے مطابق عاصم منیر نے کوئٹہ گیریژن کا دورہ کیا جہاں انہوں نے کمانڈ اینڈ اسٹاف کالج کے اساتذہ اور زیر تربیت افسران سے خطاب کیا۔

اپنے خطاب میں انہوں نے کہا کہ جدید جنگی طریقے تیزی سے تبدیل ہو رہے ہیں، اس لیے افسران کو ابھرتی ہوئی ٹیکنالوجی اور مستقبل کے عسکری چیلنجز سے مکمل آگاہ رہنا چاہیے۔

انہوں نے کہا کہ پاک فوج عوام کی حمایت سے دہشت گردی کے خاتمے کے لیے پرعزم ہے اور کسی بھی قسم کی منفی مہم یا بیرونی حمایت یافتہ دہشت گردی سے پاکستان کی ترقی کو نہیں روکا جا سکتا۔

عاصم منیر نے مزید کہا کہ بلوچستان میں امن و استحکام انتہائی اہم ہے اور پاکستان کی ترقی کو روکنے کی کوشش کرنے والی تمام قوتیں ناکام ہوں گی۔

انہوں نے اس عزم کا اعادہ کیا کہ پاکستان ترقی اور خوشحالی کے اپنے سفر کو اس کی منزل تک ضرور پہنچائے گا۔