6
اردوورلڈکینیڈا(ویب نیوز)اونٹاریو کے شہر اوریلیا سے ہٹائے گئے 17ویں صدی کے فرانسیسی مہم جو اور کیوبیک سٹی کے بانی سیموئل ڈی شیمپلین کے متنازع مجسمے کو کیوبیک کی متعدد بلدیات اور تنظیموں نے اپنے ہاں منتقل کرنے میں دلچسپی ظاہر کی ہے۔
تقریباً چار میٹر بلند کانسی کا یہ مجسمہ 2017 میں نوآبادیاتی دور کی علامت قرار دیے جانے اور اس کی علامتی حیثیت پر ہونے والی بحث کے بعد اوریلیا کے ایک پارک سے ہٹا کر گودام میں محفوظ کر دیا گیا تھا۔
اوریلیا کے میئر ڈان میک آئزک نے بتایا کہ جب حال ہی میں سٹی کونسل نے مجسمے کو پگھلا کر ختم کرنے کا امکان ظاہر کیا تو انہیں ایک درجن سے زائد دلچسپی کے اظہار موصول ہوئے۔
ان کے مطابق زیادہ تر درخواستیں کیوبیک کی بلدیات اور فرانکو-اونٹیرین برادریوں کی جانب سے آئیں۔کیوبیک کی بلدیات شیمپلین اور لیوی بھی ان شہروں میں شامل ہیں جو اس مجسمے کو اپنے ہاں نصب کرنا چاہتے ہیں۔
تاہم فی الحال مجسمہ بدستور گودام میں محفوظ رہے گا، کیونکہ اوریلیا سٹی کونسل اس کے مستقبل سے متعلق مختلف تجاویز پر غور جاری رکھے ہوئے ہے۔
