8
اردوورلڈکینیڈا(ویب نیوز)معرکۂ حق کی کامیابی کا ایک سال مکمل ہونے پر بلوچستان کے مختلف شہروں میں پاک فوج کے ساتھ اظہارِ یکجہتی کے لیے بڑے پیمانے پر ریلیوں کا انعقاد کیا گیا۔
زیارت، سنجاوی، ہرنائی، لورالائی، قلات اور چمن سمیت مختلف علاقوں میں ہزاروں شہری سڑکوں پر نکل آئے اور پاک فوج کے حق میں نعرے لگائے۔ ریلیوں میں شریک افراد نے افواجِ پاکستان کی کارکردگی کو سراہتے ہوئے قومی جذبے کا بھرپور اظہار کیا۔
شرکاء نے فیلڈ مارشل سید عاصم منیر اور افواجِ پاکستان کو خراجِ تحسین پیش کرتے ہوئے کہا کہ معرکۂ حق میں کامیابی قومی اتحاد اور قربانیوں کا نتیجہ ہے۔
بلوچستان بھر کے تعلیمی اداروں میں بھی اس موقع پر خصوصی تقریبات کا انعقاد کیا گیا۔ اسکولوں اور کالجوں کے طلبہ نے ملی نغمے پیش کیے اور تقاریر کے ذریعے پاک فوج کی خدمات کو سراہا۔
مقامی سطح پر منعقد ہونے والی ان ریلیوں کو عوامی جوش و جذبے کا مظہر قرار دیا جا رہا ہے، جہاں شہریوں نے ملکی سلامتی اور استحکام کے لیے پاک فوج کے کردار پر اعتماد کا اظہار کیا۔
