اردوورلڈکینیڈا(ویب نیوز)وزیراعظم کے سیاسی مشیر رانا ثنا اللہ نے بجٹ کے بعد وزیراعظم کی تبدیلی سے متعلق گردش کرنے والی خبروں کو مکمل طور پر بے بنیاد اور من گھڑت قرار دیتے ہوئے کہا ہے کہ ایسی افواہیں ملک میں عدم استحکام پیدا کرنے کی کوشش ہیں۔

پارلیمنٹ ہاؤس میں صحافیوں سے گفتگو کرتے ہوئے رانا ثنا اللہ نے کہا کہ بعض عناصر وزیراعظم کی تبدیلی سے متعلق بے بنیاد خبریں پھیلا رہے ہیں، حالانکہ اس میں کوئی صداقت نہیں۔ انہوں نے کہا کہ وزیراعظم شہباز شریف مؤثر انداز میں ملک کی قیادت کر رہے ہیں اور پاکستان کو ترقی کی راہ پر گامزن کر رہے ہیں۔

انہوں نے کہا کہ موجودہ حالات میں پاکستان کو عالمی سطح پر عزت اور وقار حاصل ہوا ہے، ایسے وقت میں وزیراعظم کی تبدیلی سے متعلق بحث صرف وہی لوگ کرتے ہیں جو ملک میں انتشار اور عدم استحکام چاہتے ہیں۔

رانا ثنا اللہ نے مزید کہا کہ حکومت نے ہمیشہ سیاسی معاملات کے حل کے لیے اپوزیشن کے ساتھ مذاکرات کی کوشش کی ہے۔ ان کا کہنا تھا کہ جب مسلم لیگ (ن) اپوزیشن میں تھی تو اس کے رہنماؤں کے خلاف مقدمات قائم کیے جا رہے تھے، اس کے باوجود انہوں نے جمہوری عمل پر یقین رکھا۔