اردوورلڈکینیڈا(ویب نیوز)کینیڈا میں سابق برطانوی وزیر اعظم ونسٹن چرچل کی مشہور تصویر چوری کرنے والے شخص کو اپنی سزا کے خلاف اعلیٰ ترین عدالت میں اپیل کا موقع مل گیا ہے۔ عدالت نے روایت کے مطابق اس فیصلے کی وجوہات بیان نہیں کیں اور نہ ہی سماعت کی کوئی تاریخ مقرر کی گئی ہے۔
یہ معروف تصویر، جسے “گرجتا ہوا شیر” کہا جاتا ہے، مشہور فوٹوگرافر یوسف کارش نے دسمبر انیس سو اکتالیس میں چرچل کے دورہ کینیڈا کے دوران کھینچی تھی۔ یہ تصویر اوٹاوا کے ایک تاریخی ہوٹل میں آویزاں تھی، جہاں کارش کا طویل عرصے تک اسٹوڈیو بھی رہا۔ انہوں نے یہ تصویر خود تیار کرکے فریم کی اور بطور تحفہ ہوٹل کو پیش کی تھی۔
ملزم جیفری ووڈ نے یہ تصویر دو ہزار اکیس کے اختتام اور دو ہزار بائیس کے آغاز کے درمیان چوری کی، اس کی جگہ ایک سستی نقل رکھ دی اور اصل تصویر کو لندن کے ایک نیلام گھر کے ذریعے فروخت کر دیا۔ بعد ازاں برطانیہ اور اٹلی کے حکام کی مدد سے تصویر برآمد ہوئی اور دوبارہ ہوٹل میں نمائش کے لیے رکھ دی گئی۔
عدالت نے ملزم کو پانچ ہزار ڈالر سے زائد مالیت کی چوری، جعل سازی اور چوری شدہ اشیا کی خرید و فروخت کے جرم میں دو سال سے ایک دن کم قید کی سزا سنائی تھی۔ اپیل عدالت نے بھی گزشتہ سال اس سزا کو برقرار رکھا اور قرار دیا کہ یہ سزا نامناسب نہیں تھی۔
عدالتی فیصلے میں کہا گیا کہ یہ جرم نہ صرف ایک تاریخی ہوٹل بلکہ فوٹوگرافر کی ساکھ اور عوام کے اعتماد پر بھی حملہ تھا۔ تاہم ملزم کے وکلا نے مؤقف اختیار کیا ہے کہ سزا سناتے وقت غیر ملکی عدالتی فیصلوں کو غیر ضروری اہمیت دی گئی اور متبادل سزاؤں پر مناسب غور نہیں کیا گیا۔
استغاثہ نے اس مؤقف کو مسترد کرتے ہوئے کہا کہ یہ ایک عام چوری کا معاملہ نہیں بلکہ ایک ثقافتی اور تاریخی اہمیت رکھنے والے فن پارے کی چوری تھی، جس کے اثرات عوامی سطح پر بھی محسوس کیے گئے۔
اب اعلیٰ عدالت میں ہونے والی سماعت اس بات کا تعین کرے گی کہ آیا ملزم کی سزا میں کوئی تبدیلی کی جائے گی یا نہیں۔
