اردوورلڈکینیڈا(ویب نیوز)وفاقی حکومت نے پٹرولیم مصنوعات کی قیمتوں میں اضافے کا نوٹیفکیشن جاری کر دیا ہے، جس کے تحت پٹرول اور ڈیزل دونوں کی قیمتوں میں نمایاں اضافہ کیا گیا ہے۔
پٹرولیم ڈویژن کے مطابق پٹرول کی قیمت میں چھ روپے اکیاون پیسے فی لیٹر اضافہ کیا گیا ہے، جس کے بعد نئی قیمت تین سو ننانوے روپے چھیاسی پیسے مقرر ہو گئی ہے۔ اسی طرح ڈیزل کی قیمت میں انیس روپے انتالیس پیسے فی لیٹر اضافہ کیا گیا، جس کے بعد ڈیزل کی نئی قیمت تین سو ننانوے روپے اٹھاون پیسے فی لیٹر ہو گئی ہے۔
نوٹیفکیشن کے مطابق نئی قیمتوں کا اطلاق گزشتہ رات بارہ بجے سے کر دیا گیا ہے اور ملک بھر میں ان پر عملدرآمد شروع ہو چکا ہے۔
حکومت کی جانب سے لیوی میں بھی رد و بدل کیا گیا ہے۔ پٹرول پر فی لیٹر لیوی تین روپے اٹھاسی پیسے کم کر دی گئی ہے، جبکہ ڈیزل پر فی لیٹر اٹھائیس روپے انہتر پیسے لیوی عائد کر دی گئی ہے، جو اس سے پہلے صفر تھی۔
قیمتوں میں اضافے کے اعلان سے قبل شہریوں کی بڑی تعداد نے پٹرول پمپس کا رخ کیا، جس کے باعث اسلام آباد، لاہور، کراچی اور دیگر شہروں میں پٹرول پمپس پر لمبی قطاریں دیکھنے میں آئیں۔
ماہرین کے مطابق پٹرولیم مصنوعات کی قیمتوں میں یہ اضافہ مہنگائی میں مزید اضافے کا سبب بن سکتا ہے اور اس کے اثرات عام آدمی کی زندگی پر براہ راست مرتب ہوں گے۔
