اردوورلڈکینیڈا(ویب نیوز)آزاد کشمیر قانون ساز اسمبلی کے پہلے مرحلے میں میرپور ڈویژن کے 13 حلقوں پر ہونے والے انتخابات کے غیر حتمی و غیر سرکاری نتائج کے مطابق مسلم لیگ (ن) نے میدان مار لیا ہے، جبکہ پاکستان پیپلز پارٹی بھی کئی اہم نشستیں حاصل کرنے میں کامیاب رہی۔

ابتدائی نتائج کے مطابق مسلم لیگ (ن) نے 7 اور پیپلز پارٹی نے 4 نشستوں پر کامیابی حاصل کر لی ہے، جبکہ بعض حلقوں کے مکمل نتائج ابھی آنا باقی ہیں۔

میرپور میں سخت مقابلہ

میرپور، بھمبر اور کوٹلی کے 13 حلقوں میں 288 امیدوار میدان میں تھے، جہاں لاکھوں ووٹرز نے اپنا حق رائے دہی استعمال کیا۔

مسلم لیگ (ن) اور پیپلز پارٹی کے امیدواروں کے درمیان کئی حلقوں میں کانٹے دار مقابلہ دیکھنے میں آیا، جبکہ آزاد امیدواروں اور دیگر جماعتوں نے بھی انتخابی میدان میں قسمت آزمائی کی۔

بڑے ناموں کو شکست

انتخابات میں کئی اہم سیاسی شخصیات کو اپ سیٹ شکست کا سامنا کرنا پڑا۔پیپلز پارٹی کے صدر چودھری محمد یاسین اپنے آبائی حلقہ چڑہوئی سے ہار گئے، جبکہ سابق وزیراعظم آزاد کشمیر چودھری انوارالحق بھی کامیابی حاصل نہ کر سکے۔تاہم چودھری محمد یاسین نے کوٹلی سٹی کی نشست پر کامیابی حاصل کر لی۔

یہ بھی پڑھیں :اراکین اسمبلی کے خلاف دستخطی مہم کادبائو، الیکشنز البرٹا کیلئے 6.7 ملین ڈالر اضافی فنڈز کی منظوری

ڈڈیال میں ن لیگ کامیاب

حلقہ ایل اے ون ڈڈیال کے غیر حتمی نتائج کے مطابق مسلم لیگ (ن) کے چودھری اظہر صادق کامیاب ہوگئے۔انہوں نے 15 ہزار 427 ووٹ حاصل کیے جبکہ پیپلز پارٹی کے امیدوار چودھری افسر شاہد 9 ہزار 832 ووٹ لے کر دوسرے نمبر پر رہے۔

پیپلز پارٹی کی بڑی کامیابیاں

حلقہ ایل اے 2 چکسواری اسلام گڑھ میں پیپلز پارٹی کے قاسم مجید نے کامیابی حاصل کی۔قاسم مجید نے 12 ہزار 904 ووٹ حاصل کیے جبکہ مسلم لیگ (ن) کے عظیم بخش چودھری 8 ہزار 182 ووٹ لے سکے۔میرپور سٹی کے حلقہ ایل اے 3 میں بھی پیپلز پارٹی کامیاب رہی، جہاں یاسر سلطان نے 12 ہزار 590 ووٹ لے کر کامیابی حاصل کی۔

بھمبر میں ن لیگ کا غلبہ

حلقہ ایل اے 7 بھمبر میں مسلم لیگ (ن) کے چودھری طارق فاروق نے سابق وزیراعظم چودھری انوارالحق کو شکست دے دی۔طارق فاروق نے 35 ہزار 490 ووٹ حاصل کیے جبکہ چودھری انوارالحق 25 ہزار 100 ووٹ لے سکے۔

برنالہ اور سماہنی کے حلقوں میں بھی مسلم لیگ (ن) کے امیدواروں کو برتری حاصل رہی، تاہم بعض انتخابی معاملات کے باعث مکمل نتائج کا اعلان تاخیر کا شکار ہوا۔

کوٹلی میں دلچسپ مقابلے

کوٹلی کے کئی حلقوں میں سخت مقابلہ دیکھنے میں آیا۔حلقہ ایل اے 9 نکیال میں مسلم لیگ (ن) کے عمیر نعیم نے 31 ہزار 37 ووٹ حاصل کر کے پیپلز پارٹی کے جاوید اقبال بڈھانوی کو شکست دی۔جبکہ کوٹلی سٹی میں پیپلز پارٹی کے صدر چودھری محمد یاسین کامیاب ہوگئے۔

چڑہوئی میں بڑا اپ سیٹ

حلقہ ایل اے 12 چڑہوئی میں بڑا سیاسی اپ سیٹ ہوا، جہاں مسلم لیگ (ن) کے راجہ ریاست خان نے پیپلز پارٹی کے صدر چودھری محمد یاسین کو شکست دے دی۔راجہ ریاست خان نے 35 ہزار 168 ووٹ حاصل کیے جبکہ چودھری یاسین 30 ہزار 320 ووٹ لے سکے۔

انتخابی عمل مکمل

چیف الیکشن کمشنر آزاد جموں و کشمیر جسٹس ریٹائرڈ غلام مصطفیٰ مغل نے کہا ہے کہ انتخابات کا پہلا مرحلہ آزادانہ اور شفاف انداز میں مکمل ہوا۔

انہوں نے کہا کہ عوام نے بڑی تعداد میں ووٹ ڈالے جبکہ امن و امان برقرار رکھنے کے لیے قانون نافذ کرنے والے اداروں نے اہم کردار ادا کیا۔

چیف الیکشن کمشنر کے مطابق سماہنی میں پولنگ میں رکاوٹ ڈالنے والوں کے خلاف کارروائی کی گئی اور انتخابی قوانین کی خلاف ورزی برداشت نہیں کی جائے گی۔