اردو ورلڈ کینیڈا ( ویب نیوز ) سسکیچیوان کے علاقے لا رونج کے شمال میں واقع میک ٹیویش جھیل کے قریب جنگلی جانور کے مشتبہ حملے میں دو افراد ہلاک ہو گئے۔
پولیس نے واقعے کی تحقیقات شروع کر دی ہیں، جبکہ حملے میں ملوث جانور کی شناخت تاحال نہیں ہو سکی۔حکام کے مطابق 15 جولائی کو پولیس کو میک ٹیویش جھیل کے علاقے میں ایک ہنگامی واقعے کی اطلاع موصول ہوئی۔ موقع پر پہنچنے والے آر سی ایم پی اہلکاروں کو دو افراد کی لاشیں ملیں، جن کی ابتدائی تحقیقات سے ظاہر ہوتا ہے کہ اموات ممکنہ طور پر کسی جنگلی جانور کے حملے کا نتیجہ ہیں۔
پولیس کا کہنا ہے کہ ابھی تک اس بات کی تصدیق نہیں ہو سکی کہ حملے میں کون سا جنگلی جانور ملوث تھا۔ واقعے کی مکمل تحقیقات جاری ہیں اور ممکنہ جانور کی شناخت اور تلاش کے لیے وائلڈ لائف ریسپانس ٹیم، رائل کینیڈین ماونٹڈ پولیس (RCMP) اور سسکیچیوان کورونرز سروس مشترکہ طور پر کام کر رہے ہیں۔
سسکیچیوان کی وزارتِ کمیونٹی سیفٹی نے واقعے پر گہرے دکھ کا اظہار کرتے ہوئے جاں بحق افراد کے اہلِ خانہ سے تعزیت کی ہے۔ وزارت نے علاقے کے رہائشیوں، کاٹیج مالکان اور سیاحوں سے اپیل کی ہے کہ وہ جنگلاتی علاقوں میں غیر ضروری نقل و حرکت سے گریز کریں، محتاط رہیں اور جنگلی جانوروں سے محفوظ فاصلہ برقرار رکھیں۔حکام کا کہنا ہے کہ تحقیقات مکمل ہونے تک واقعے کی مزید تفصیلات جاری نہیں کی جائیں گی۔
