اردوورلڈکینیڈا(ویب نیوز)کینیڈا کے صوبہ اونٹاریو کے شمال مغربی علاقوں میں جنگلاتی آگ کے پھیلنے کے باعث متعدد کمیونٹیز کے رہائشیوں کو فوری طور پر اپنے گھر چھوڑنے کا حکم دے دیا گیا ہے۔
اونٹاریو پروونشل پولیس (OPP) کے مطابق آرمسٹرانگ، لیک لا کروس فرسٹ نیشن، کولنز فرسٹ نیشن، وائٹ سینڈ فرسٹ نیشن اور لیک ڈیس ملے لیکس فرسٹ نیشن میں لازمی انخلا کے احکامات نافذ کر دیے گئے ہیں۔
پولیس کا کہنا ہے کہ ان علاقوں میں انخلا لازمی قرار دیا گیا ہے جبکہ کئی شاہراہوں کے مختلف حصے بھی بند کر دیے گئے ہیں۔ تاہم ہائی وے 11 کا وہ حصہ، جو ہائی وے 633 اور ہائی وے 623 کے درمیان واقع ہے، دوبارہ ٹریفک کے لیے کھول دیا گیا ہے۔
جنگلاتی آگ سے رینی ریور ڈسٹرکٹ اور کیاشکے زاگنگ انیشنابیک (گل بے فرسٹ نیشن) سمیت دیگر قریبی علاقے بھی خطرے کی زد میں ہیں۔
پولیس نے تصدیق کی ہے کہ وہ گل بے فرسٹ نیشن میں لازمی انخلا کے عمل میں معاونت کرے گی۔
پولیس نے منگل کی رات جاری بیان میں کہا کہ متاثرہ علاقوں کے تمام رہائشی فوری طور پر اپنے گھروں سے نکل جائیں اور جنگلاتی آگ سے محفوظ مقامات پر منتقل ہو جائیں۔
ایمرجنسی مینجمنٹ اونٹاریو نے ہدایت کی ہے کہ انخلا کے احکامات والے علاقوں کے رہائشی جنوب کی جانب تھنڈر بے منتقل ہوں۔
تاہم کیاشکے زاگنگ انیشنابیک کی انتظامیہ نے اپنے بیان میں کہا کہ تھنڈر بے میں متاثرین کے لیے رہائش کی سہولت دستیاب نہیں، جبکہ متبادل مقامات پر منتقلی کی صورت میں بعض خاندانوں کو ایک ساتھ رہائش نہیں مل سکے گی۔
بیان میں مزید کہا گیا کہ جو رہائشی بدھ کی صبح تک کمیونٹی میں موجود ہوں گے، انہیں ہوائی جہاز کے ذریعے ٹورنٹو منتقل کیا جائے گا۔
کمیونٹی انتظامیہ نے کہا، "ہم پوری کوشش کر رہے ہیں اور ہر ممکن اقدام اٹھا رہے ہیں تاکہ بے گھر ہونے والے افراد کو جلد از جلد آرام دہ رہائش فراہم کی جا سکے۔”
ادھر اونٹاریو پروونشل پولیس نے اگنیس، کرسٹل لیک اور ہائی وے 633 کے اطراف رہنے والے افراد کو بھی ممکنہ انخلا کے لیے تیار رہنے کی ہدایت کی ہے۔
شدید جنگلاتی آگ اور گرد و نواح میں جاری انخلا کی کارروائیوں کے باعث واباکیمی پروونشل پارک کو 20 جولائی تک بند کر دیا گیا ہے۔
اونٹاریو کے جنگلاتی آگ سے نمٹنے والے حکام کے مطابق اس وقت صوبے بھر میں 160 جنگلاتی آگ سرگرم ہیں، جن میں سے 128 آگیں شمال مغربی اونٹاریو میں رپورٹ ہوئی ہیں۔
ان میں سے 53 آگیں اب بھی قابو سے باہر ہیں، 8 آگوں کو محدود کر دیا گیا ہے، 4 آگوں پر مکمل قابو پا لیا گیا ہے، جبکہ 63 آگوں کی مسلسل نگرانی کی جا رہی ہے۔
سوشل میڈیا پر سامنے آنے والی تصاویر اور ویڈیوز میں آسمان کی جانب اٹھتے سیاہ اور سرمئی دھوئیں کے بادل اور بلند شعلے واضح طور پر دیکھے جا سکتے ہیں۔
دوسری جانب انوائرمنٹ کینیڈا نے منگل کے روز شمالی اونٹاریو کے بیشتر علاقوں میں شدید گرمی کی وارننگ بھی جاری کی، جہاں نمی کے باعث محسوس ہونے والا درجہ حرارت 40 ڈگری سینٹی گریڈ تک پہنچ گیا، جس سے آگ پر قابو پانے کی کوششیں مزید مشکل ہو گئی ہیں۔
