کیلگری، البرٹا — یکم ستمبر 2026
تحریر: محمد امان اللہ
البرٹا ڈے کے موقع پر وزیرِاعلیٰ البرٹا ڈینیئل اسمتھ نے صوبے کی تاریخ، روایات اور ترقی میں مختلف پس منظر رکھنے والے شہریوں کے کردار کو سراہتے ہوئے البرٹا کے عوام کو مبارکباد پیش کی ہے۔
وزیرِاعلیٰ ڈینیئل اسمتھ نے اپنے خصوصی پیغام میں کہا کہ یکم ستمبر 1905 کو البرٹا ایکٹ کے نفاذ کے ساتھ البرٹا باضابطہ طور پر کینیڈا کا صوبہ بنا۔ انہوں نے کہا کہ البرٹا ڈے صرف ایک تاریخی دن نہیں بلکہ ان افراد، خاندانوں اور کمیونٹیز کو یاد کرنے کا موقع بھی ہے جنہوں نے گزشتہ 121 برسوں کے دوران صوبے کی تعمیر اور ترقی میں اہم کردار ادا کیا۔
انہوں نے کہا کہ مختلف نسلوں، ثقافتوں اور پس منظر سے تعلق رکھنے والے لوگوں نے محنت، جدت، عزم اور آزادی کے مشترکہ جذبے کے ذریعے البرٹا کو ایک مضبوط اور خوشحال صوبے میں تبدیل کیا۔ آج صوبے کی متحرک کمیونٹیز، ترقی کرتی صنعتیں اور بہتر معیارِ زندگی اسی مشترکہ جدوجہد کا نتیجہ ہیں۔
وزیرِاعلیٰ کے مطابق البرٹا نے نہ صرف کینیڈا کی معیشت کو مضبوط بنانے میں اہم کردار ادا کیا بلکہ توانائی، زراعت اور غذائی پیداوار کے شعبوں میں بھی دنیا بھر میں اپنی نمایاں حیثیت قائم کی ہے۔ صوبے کی قدرتی دولت اور محنت کش عوام نے کینیڈا کی مجموعی ترقی میں اہم حصہ ڈالا ہے۔
ڈینیئل اسمتھ نے کہا کہ البرٹا آج بھی مواقع، جدت، قدرتی خوبصورتی اور آزادی کے منفرد جذبے کی علامت ہے۔ انہوں نے اس عزم کا اظہار کیا کہ البرٹا کے عوام کے لیے مزید مواقع پیدا کرنے اور ایک مضبوط، خوشحال اور خودمختار البرٹا کی تعمیر کا سفر جاری رکھا جائے گا، جبکہ صوبہ ایک متحدہ کینیڈا کا حصہ رہے گا۔
انہوں نے البرٹا کے تمام شہریوں کی خدمات اور صوبے کی ترقی میں ان کے کردار کو خراجِ تحسین پیش کرتے ہوئے کہا کہ البرٹا کا مستقبل بھی اسی اتحاد، محنت اور عزم سے تشکیل پائے گا جس نے اسے آج کا مضبوط صوبہ بنایا ہے۔
وزیرِاعلیٰ ڈینیئل اسمتھ نے آخر میں البرٹا کے عوام کو ہیپی البرٹا ڈے کی مبارکباد پیش کی اور صوبے کے روشن مستقبل کے لیے نیک خواہشات کا اظہار کیا۔
