اردوورلڈکینیڈا(ویب نیوز)ایڈمنٹن میں پیدا ہونے والا 40 سالہ کرٹس رائٹ امریکا میں امیگریشن حکام کی حراست میں نو ماہ گزارنے کے بعد کینیڈا واپس پہنچ گیا، جہاں اس نے دورانِ حراست پیش آنے والے حالات اور قانونی مشکلات کے بارے میں تفصیلات بیان کردی ہیں۔
کرٹس رائٹ نے اپنی زندگی کا بیشتر حصہ امریکا میں گزارا اور ٹیکساس کو اپنا گھر سمجھتا تھا۔ گزشتہ نومبر میں کاروباری دورے کے سلسلے میں میکسیکو جانے کے بعد جب وہ واپس ٹیکساس پہنچا تو امریکی امیگریشن حکام نے اسے ایئرپورٹ پر روک لیا۔
17 سال کی عمر کا مقدمہ
رائٹ کے مطابق اس کی گرفتاری کی بنیادی وجہ 2004 میں پیش آنے والا ایک معمولی نوعیت کا منشیات رکھنے کا مقدمہ تھا، جو اس وقت درج ہوا تھا جب اس کی عمر صرف 17 سال تھی۔
انہوں نے بتایا کہ وہ اس واقعے کے بعد ایک سو سے زیادہ مرتبہ امریکا سے باہر گیا اور واپس آیا، لیکن کبھی اس طرح کی صورتحال کا سامنا نہیں کرنا پڑا۔
رائٹ نے کہا کہ انہیں یہ توقع نہیں تھی کہ امریکی امیگریشن اینڈ کسٹمز انفورسمنٹ یعنی ICE انہیں گرفتار کرے گا، کیونکہ ان کا خیال تھا کہ حکام کی توجہ زیادہ سنگین جرائم میں ملوث افراد پر ہے۔
ایئرپورٹ پر حراست
رائٹ نے بتایا کہ میکسیکو سے ٹیکساس واپسی پر انہیں معمول کی امیگریشن جانچ کے دوران اضافی تفتیش کے لیے الگ کردیا گیا۔
ایک اہلکار نے ان سے 2004 کے منشیات رکھنے کے مقدمے کے بارے میں سوال کیا اور پوچھا کہ کیا ان پر اس وقت معمولی نوعیت کا مقدمہ درج ہوا تھا۔
رائٹ نے بتایا کہ جب انہوں نے اس کی تصدیق کی تو اہلکار نے انہیں کہا کہ وہ اپنے خاندان کے کسی فرد کو پیغام بھیج کر بتادیں کہ انہیں واپس آنے میں کچھ وقت لگ سکتا ہے کیونکہ معاملے کی مزید تحقیقات کرنا ہوں گی۔
اس کے بعد انہیں ایک الگ کمرے میں لے جایا گیا جہاں ان سے تقریباً اس انداز میں پوچھ گچھ کی گئی جیسے وہ کسی جرم کے مرتکب ہوئے ہوں۔
زنجیروں میں باندھ کر منتقل کیا گیا
رائٹ کے مطابق پوچھ گچھ مکمل ہونے کے بعد اہلکار نے انہیں بتایا کہ وہ اب حراست میں ہیں اور انہیں وفاقی حراستی مرکز منتقل کیا جائے گا۔
یہ بھی پڑھیں :نینسی پلوسی کے شوہر پر حملے کا مشتبہ شخص پہلے کینیڈا میں رہتا تھا: امریکی رپورٹس
انہوں نے بتایا کہ اس کے بعد ان کے ہاتھوں اور کمر کے گرد زنجیریں باندھی گئیں جبکہ ٹخنوں میں بھی بیڑیاں ڈال دی گئیں اور انہیں ایک سیل میں رکھا گیا۔رائٹ نے کہا کہ ان کے ساتھ ایسا سلوک کیا گیا جیسے وہ کسی انتہائی سنگین جرم میں سزا یافتہ قیدی ہوں۔
ضمانت کا موقع نہ مل سکا
رائٹ کے مطابق انہیں بتایا گیا کہ چونکہ انہیں وفاقی سطح پر حراست میں لیا گیا ہے، اس لیے انہیں ضمانت نہیں دی جاسکتی۔
ان کا کہنا تھا کہ حکام نے انہیں ایسے شخص کے طور پر درج کیا جو امریکا میں دوبارہ داخل ہونے والا ’’وزٹنگ ایلین‘‘ تھا، جس کی وجہ سے انہیں ضمانت حاصل کرنے کا موقع نہیں ملا۔
رائٹ نے دعویٰ کیا کہ اگر انہیں امریکا کے اندر موجودگی کے دوران ICE نے گرفتار کیا ہوتا تو ممکنہ طور پر انہیں ضمانت مل سکتی تھی اور وہ حراست سے باہر رہ کر اپنے مقدمے کا دفاع کرسکتے تھے۔
مقدمے کی تاریخ بار بار مؤخر
رائٹ نے بتایا کہ ان کا عدالتی عمل بھی مسلسل تاخیر کا شکار رہا۔ان کے مطابق پہلی سماعت 3 دسمبر کو مقرر تھی، لیکن اسے متعدد مرتبہ مؤخر کیا گیا اور بالآخر 16 جنوری کو سماعت ہوئی۔
انہوں نے دعویٰ کیا کہ حراستی مراکز کے خراب حالات اور مقدمات کی بار بار تاخیر کا مقصد بعض افراد کو قانونی جنگ چھوڑنے پر مجبور کرنا ہوسکتا ہے۔
رائٹ نے کہا کہ انہیں بار بار بتایا جاتا رہا کہ سماعت مزید دو یا تین ہفتے بعد ہوگی، جس سے حراست کا دورانیہ مسلسل بڑھتا گیا۔
پانچ ماہ بعد مقدمہ ہار گئے
رائٹ کے مطابق تقریباً پانچ ماہ بعد ان کا عدالتی عمل مکمل ہوا، تاہم وہ اپنا مقدمہ ہار گئے۔انہوں نے کہا کہ امیگریشن عدالت کے معمول کے طریقہ کار کے مطابق انہیں تین مواقع ملنے چاہئیں تھے اور تیسری تاریخ پر باقاعدہ ٹرائل ہونا تھا، لیکن انہیں اپنے مقدمے کا مکمل دفاع کرنے کا موقع نہیں ملا۔
ان کے مطابق دوسری سماعت کے موقع پر ہی انہیں ’’آرڈر آف ریموول‘‘ یعنی ملک بدری کا حکم دے دیا گیا۔
رائٹ نے اس فیصلے کے خلاف اپیل بھی کی اور حراست سے رہائی کے لیے وفاقی عدالت میں ہیبیس کارپس کی درخواست بھی دائر کی، تاہم انہیں امریکا میں رہ کر مقدمہ لڑنے کا موقع نہیں مل سکا۔
بچوں سے دور ہونے کا خوف
رائٹ کے مطابق امریکا میں رہنے کے لیے قانونی جنگ لڑنے کی سب سے بڑی وجہ ان کے دو بیٹے تھے، جو ان کی سابقہ اہلیہ کے ساتھ ٹیکساس میں رہتے ہیں۔
ان کے دونوں بیٹوں کی عمریں 8 اور 11 سال ہیں اور رائٹ کے مطابق انہیں بچوں کی مشترکہ تحویل حاصل تھی، جس کے تحت وہ سال کا تقریباً نصف وقت اپنے بچوں کے ساتھ گزارتے تھے۔
انہوں نے کہا کہ اگر انہیں کینیڈا واپس بھیج دیا جاتا تو ان کے بیٹوں کے لیے ان کے ساتھ آنا ممکن نہیں تھا، اسی لیے وہ مسلسل امریکا میں رہنے اور اپنے خاندان کے قریب رہنے کے لیے قانونی جنگ لڑتے رہے۔
اگست میں کینیڈا واپسی
کرٹس رائٹ کو بالآخر اگست کے وسط میں کینیڈا واپس بھیج دیا گیا۔ اب وہ اپنی منگیتر کیلا تھامسن، دو سالہ بیٹی اور والدین کے ساتھ عارضی طور پر برٹش کولمبیا کے شہر کیلونا میں مقیم ہیں۔
نو ماہ تک امریکی ICE حراستی مراکز میں رہنے کے بعد کینیڈا واپسی پر رائٹ نے اپنی کہانی بیان کرتے ہوئے کہا کہ انہیں اس پورے عمل کے دوران شدید مشکلات کا سامنا کرنا پڑا۔
ان کا معاملہ اس بحث کے درمیان سامنے آیا ہے کہ امریکی امیگریشن حکام کی جانب سے حراست، ضمانت اور ملک بدری کے طریقہ کار میں پرانے اور معمولی نوعیت کے جرائم کے حامل افراد کے ساتھ کس طرح برتاؤ کیا جاتا ہے۔
