اردوورلڈکینیڈا(ویب نیوز)کینیڈا کے صوبے البرٹا کی حکومت نے صحت کے نظام میں اصلاحات، مریضوں کے حقوق کے تحفظ اور سرکاری طبی سہولیات میں جوابدہی بہتر بنانے کے لیے نیا قانون سازی پیکج متعارف کرا دیا ہے۔
بل 39 کے تحت سرکاری فنڈنگ سے چلنے والے طبی مراکز میں مریضوں کے ساتھ بدسلوکی کی روک تھام، شدید نشے کے عادی افراد کے علاج، ذہنی صحت کی سہولیات میں رابطہ کاری اور عوامی فنڈنگ سے فراہم کی جانے والی لیبارٹری خدمات کے قواعد میں تبدیلیاں تجویز کی گئی ہیں۔
ہیلتھ اسٹیچیوٹس امینڈمنٹ ایکٹ 2026 (نمبر 2) کے نام سے پیش کیے گئے بل کا مقصد صحت کے نظام میں شفافیت، مریضوں کی حفاظت اور طبی اداروں کی ذمہ داریوں کو مزید واضح بنانا ہے۔
البرٹا کے وزیر برائے پرائمری اینڈ پریوینٹو ہیلتھ سروسز جسٹن رائٹ نے کہا کہ جب صوبے کے شہری بیماری یا کسی دوسری کمزوری کے باعث دوسروں کی دیکھ بھال کے محتاج ہوں تو انہیں محفوظ اور باعزت علاج ملنا چاہیے۔ ان کے مطابق مجوزہ ترامیم مریضوں کے تحفظ کو مضبوط بنانے، اداروں کی جوابدہی بڑھانے اور خاندانوں کا اعتماد بحال کرنے میں مدد دیں گی۔
مریضوں سے بدسلوکی پر تحقیقات اور اداروں کی جوابدہی سخت ہوگی
بل 39 کے تحت پروٹیکشن فار پرسنز اِن کیئر ایکٹ میں ترامیم تجویز کی گئی ہیں، جن کے ذریعے یہ واضح کیا جائے گا کہ سرکاری فنڈنگ سے چلنے والی کون سی طبی اور معاون خدمات فراہم کرنے والی تنظیمیں اس قانون کے دائرے میں آتی ہیں۔
مجوزہ تبدیلیوں کے تحت مریضوں سے بدسلوکی کی شکایات کی تحقیقات، اپیلوں، قانونی تعمیل اور کارروائی کے طریقہ کار کو بہتر بنایا جائے گا تاکہ کسی بھی شکایت کو مناسب انداز میں نمٹایا جا سکے۔
یہ بھی پڑھیں :البرٹا صحت شعبے میں بدعنوانی کا معاملہ،وزیر صحت کو نہیں ہٹایا جائیگا،ڈینیئل اسمتھ
حکومت کے مطابق مریضوں کے موجودہ تحفظات اور اپیل کے حقوق برقرار رہیں گے، جبکہ نئی ترامیم سے طبی مراکز میں زیر علاج افراد کی عزت، سلامتی اور حقوق کے تحفظ کو مزید مؤثر بنایا جا سکے گا۔
شدید نشے کے عادی افراد کے علاج کے لیے نیا طریقہ کار
قانونی پیکج کا ایک اہم حصہ شدید نشے اور منشیات کے استعمال کے مسائل سے دوچار افراد کے علاج سے متعلق ہے۔ البرٹا حکومت کمپیشنیٹ انٹروینشن ایکٹ کے تحت ایسے افراد کے لیے خصوصی طبی مداخلت کا نظام متعارف کر رہی ہے جن کی نشے کی عادت انہیں خود اپنے لیے یا دوسروں کے لیے خطرہ بنا چکی ہو۔
اس قانون کے تحت خاندان کے افراد، قانونی سرپرست، طبی ماہرین، پولیس اور امن و امان کے اہلکار کسی ایسے شخص کے لیے طبی جائزے کا حکم حاصل کرنے کی درخواست دے سکیں گے، جسے نشے کی شدید حالت کے باعث فوری علاج کی ضرورت ہو۔ یہ طریقہ کار آخری چارہ کار کے طور پر استعمال کیا جائے گا۔
مجوزہ ترامیم کے ذریعے درخواستوں اور سماعتوں کے عمل کو بہتر بنانے، متعلقہ معلومات تک بروقت رسائی، طبی ماہرین کو علاج کے فیصلوں میں زیادہ لچک دینے اور نگرانی کے نظام کو واضح کرنے کی تجویز دی گئی ہے۔
حکومت کا کہنا ہے کہ موجودہ حفاظتی اقدامات اور قانونی ضمانتیں برقرار رہیں گی، جبکہ اس نظام پر عمل درآمد موسم بہار 2027 میں متوقع ہے۔
البرٹا کے وزیر برائے مینٹل ہیلتھ اینڈ ایڈکشن رک ولسن نے کہا کہ حکومت شدید نشے کے مسائل سے دوچار شہریوں کو محفوظ، مربوط اور یکساں طبی علاج فراہم کرنے کے لیے اقدامات کر رہی ہے تاکہ انہیں صحت یابی کی طرف لایا جا سکے۔
ذہنی صحت کے مریضوں کے علاج میں بھی تبدیلیاں
بل 39 کے تحت مینٹل ہیلتھ ایکٹ میں بھی ترامیم تجویز کی گئی ہیں، جن کا مقصد منظور شدہ ہسپتالوں کے اندر صحت کی مختلف سروسز کے درمیان رابطہ کاری بہتر بنانا ہے۔
حکومت کے مطابق اس اقدام سے ذہنی صحت کے مسائل سے دوچار مریضوں کو ضرورت کے مطابق علاج فراہم کرنے میں مدد ملے گی، جبکہ ان کے قانونی حقوق اور تحفظات بھی برقرار رہیں گے۔
میڈیکل لیبارٹری ٹیسٹوں کی سرکاری فنڈنگ برقرار رکھنے کا فیصلہ
قانونی پیکج میں البرٹا ہیلتھ کیئر انشورنس ایکٹ میں تبدیلیاں بھی شامل ہیں، جن کے ذریعے عوامی فنڈنگ سے فراہم کی جانے والی لیبارٹری خدمات کے قواعد واضح کیے جائیں گے۔
مجوزہ ترامیم کے مطابق بیمہ شدہ طبی علاج اور ڈاکٹر کی سفارش پر کرائے جانے والے ضروری لیبارٹری ٹیسٹوں کی مفت سہولت برقرار رہے گی، جبکہ نجی کلینکس کو ایسی لیبارٹری خدمات کے اخراجات خود برداشت کرنا ہوں گے جو سرکاری ہیلتھ انشورنس کے تحت شامل نہیں ہیں۔
حکومت کا کہنا ہے کہ اس اقدام کا مقصد شہریوں کو ضروری طبی ٹیسٹوں تک بلا معاوضہ رسائی فراہم کرنا اور نجی طبی مراکز کی مالی ذمہ داریوں کو واضح کرنا ہے۔
نجی علاج کے لیے سیلف انشورنس پر بھی نگرانی ہوگی
البرٹا حکومت نے ان شہریوں کے لیے بھی قواعد متعارف کرانے کی تجویز دی ہے جو سرکاری طبی نظام سے باہر اپنی مرضی کے اختیاری علاج کے اخراجات سیلف انشورنس کے ذریعے برداشت کرنا چاہتے ہیں۔
اس مقصد کے لیے ڈاکٹروں اور انشورنس فراہم کرنے والے اداروں پر ریکارڈ محفوظ رکھنے اور متعلقہ معلومات حکومت کو فراہم کرنے کی شرائط عائد کی جائیں گی۔
وزیر برائے ہسپتال اینڈ سرجیکل ہیلتھ سروسز ایڈریانا لاگرینج کے مطابق ان تبدیلیوں سے نجی علاج کے لیے سیلف انشورنس کے نظام میں واضح قواعد اور مضبوط نگرانی قائم ہوگی، تاہم البرٹا کے کسی شہری کو سیلف انشورنس کروانے کا پابند نہیں بنایا جائے گا اور سرکاری صحت کی سہولیات تک شہریوں کی موجودہ رسائی برقرار رہے گی۔
پبلک ہیلتھ کے قوانین میں بھی تبدیلیاں
بل 39 کے تحت پبلک ہیلتھ ایکٹ کو اپ ڈیٹ کرنے اور بعض پرانی قانونی ترامیم ختم کرنے کی تجویز بھی شامل ہے، تاکہ پبلک ہیلتھ انسپکٹرز کو البرٹا ہیلتھ سروسز سے پرائمری کیئر البرٹا منتقل کرنے کے عمل میں سہولت فراہم کی جا سکے۔
حکومت کے مطابق ان تمام تبدیلیوں کا بنیادی مقصد صوبے کے صحت کے نظام کو جدید تقاضوں سے ہم آہنگ کرنا، طبی خدمات کی نگرانی بہتر بنانا اور مریضوں کو محفوظ و معیاری علاج کی فراہمی یقینی بنانا ہے۔
