اردو ورلڈ کینیڈا ( ویب نیوز ) امریکا نے ایران کے ساتھ کشیدگی میں کمی اور خطے میں استحکام کے لیے نئی سفارتی پیش رفت کرتے ہوئے ایرانی پاسدارانِ انقلاب کے ساتھ براہِ راست رابطے کا فیصلہ کر لیا ہے۔
امریکی نائب صدر جے ڈی وینس نے ایک برطانوی نیوز ویب سائٹ کو دیے گئے انٹرویو میں بتایا کہ امریکی سینٹ کام اور ایرانی پاسدارانِ انقلاب کے حکام کے درمیان قطر کے دارالحکومت دوحہ میں ملاقات متوقع ہے۔ ان کے مطابق اس ملاقات میں دونوں ممالک کے درمیان اختلافات کم کرنے، معاشی مراعات، باہمی تعاون اور خطے میں کشیدگی میں کمی کے امکانات پر تبادلہ خیال کیا جائے گا۔
جے ڈی وینس نے مزید کہا کہ متحدہ عرب امارات نے حالیہ عرصے میں ایران کے ساتھ ایسے نئے سفارتی رابطے قائم کیے ہیں جو ماضی میں موجود نہیں تھے۔ ان کا کہنا تھا کہ ان روابط میں ایرانی پاسدارانِ انقلاب کے ساتھ براہِ راست رابطے بھی شامل ہیں، جو خطے میں جاری سفارتی کوششوں کا اہم حصہ ہیں۔دوسری جانب امریکی وزیر خارجہ مارکو روبیو نے آبنائے ہرمز کی صورتحال پر بات کرتے ہوئے واضح کیا کہ کوئی بھی ملک اس اہم بین الاقوامی بحری گزرگاہ سے گزرنے والے جہازوں پر ٹیکس عائد نہیں کر سکتا۔
انہوں نے کہا کہ آبنائے ہرمز میں بحری آمدورفت میں رکاوٹ یا اس پر کسی قسم کی پابندی بین الاقوامی معاہدوں کی خلاف ورزی تصور ہوگی۔خلیجی ممالک کے رہنماؤں سے ملاقات کے بعد مارکو روبیو نے مزید کہا کہ ایران کے ساتھ ہونے والے کسی بھی ممکنہ معاہدے میں امریکا اپنے خلیجی اتحادیوں کی سلامتی اور مفادات کے تحفظ کو بھی یقینی بنائے گا، جبکہ خطے میں آزادانہ بحری نقل و حرکت کو برقرار رکھنا امریکا اور اس کے شراکت داروں کی بنیادی ترجیح رہے گی۔
