اردوورلڈکینیڈا(ویب نیوز)کینیڈا کی وزیر صنعت میلانی جولی کے دفتر نے اسٹیلنٹس کے برامپٹن اسمبلی پلانٹ کو دفاعی سازوسامان تیار کرنے والی کمپنی روشن انکارپوریشن (Roshel) کو فروخت کرنے کے معاملے میں وفاقی حکومت کے فعال کردار سے متعلق میڈیا رپورٹس کی تردید کردی ہے۔
وزیر کے ترجمان کا کہنا ہے کہ میلانی جولی نے دونوں کمپنیوں کے درمیان فروخت کے معاہدے پر مذاکرات میں کوئی حصہ نہیں لیا بلکہ ان کا کردار صرف اسٹیلنٹس اور مزدور یونین کے درمیان تنازع حل کرنے تک محدود تھا۔
کینیڈین میڈیا کے مطابق وزیر صنعت کے ترجمان میتھیس ڈینس نے بدھ کی شام وضاحت کرتے ہوئے کہا کہ یہ رپورٹنگ درست نہیں کہ میلانی جولی روشن کے ساتھ پلانٹ کی فروخت کے معاہدے میں شامل تھیں۔ وزیر نے نہ تو روشن کے ساتھ کوئی ملاقات کی اور نہ ہی اسٹیلنٹس کے ساتھ فروخت کے معاہدے پر مذاکرات کیے۔
ان کے مطابق وزیر صنعت نے اسٹیلنٹس اور یونifor یونین کے درمیان اختلافات ختم کرانے اور معاملے کا قابل قبول حل تلاش کرنے کے لیے بات چیت میں حصہ لیا تھا۔ یہ یونین کینیڈا میں اسٹیلنٹس کے 9 ہزار سے زائد ملازمین کی نمائندگی کرتی ہے۔
امریکا میں پیداوار منتقل کرنے پر حکومت اور کمپنی میں اختلافات
ترجمان کے مطابق اسٹیلنٹس نے اکتوبر 2025 میں اعلان کیا تھا کہ برامپٹن پلانٹ کے لیے پہلے سے مختص گاڑیوں کی پیداوار امریکا منتقل کی جائے گی، جس کے بعد کمپنی اور وفاقی حکومت کے درمیان کیے گئے وعدوں پر عمل درآمد کا معاملہ پیدا ہوا۔
ان کا کہنا تھا کہ یہ فیصپلہ اسٹیلنٹس کی جانب سے وفاقی حکومت کے ساتھ کیے گئے معاہدے کی خلاف ورزی تھا، جس کے تحت کمپنی کو اسٹریٹجک رسپانس فنڈ (Strategic Response Fund) کے ذریعے 529 ملین ڈالر تک کی مالی معاونت فراہم کرنے کا وعدہ کیا گیا تھا۔
میتھیس ڈینس نے کہا کہ وزیر، ان کا محکمہ اور متعلقہ ٹیم کبھی ایسے معاہدے کی منظوری نہیں دیتے جو ایک طرف وفاقی مالی معاونت سے وابستہ شرائط پوری نہ کرے اور دوسری طرف مزدور یونین کی منظوری کے بغیر طے کیا جائے۔
انہوں نے مزید کہا کہ حکومت اسٹیلنٹس کو پہلے ہی واضح کرچکی تھی کہ اگر کمپنی ایسا کوئی معاہدہ یا فروخت کا فیصلہ کرتی ہے جو اسٹریٹجک رسپانس فنڈ کے تحت کیے گئے وعدوں کے مطابق نہیں ہوگا تو وفاقی حکومت دستیاب قانونی اور انتظامی اختیارات استعمال کرے گی۔
کارنی نے پلانٹ کی فروخت کو کارکنوں سے غداری قرار دیا تھا
وزیراعظم مارک کارنی نے منگل کو اسٹیلنٹس کی جانب سے برامپٹن پلانٹ کی فروخت پر سخت ردعمل دیتے ہوئے کہا تھا کہ یہ فیصلہ کمپنی کے متعدد معاہدوں کے تحت اپنی ذمہ داریوں کی خلاف ورزی ہے۔
ان کا کہنا تھا کہ یہ اقدام ناقابل قبول ہے اور اس سے بڑھ کر یہ کارکنوں کے ساتھ غداری کے مترادف ہے، کیونکہ کمپنی نے کینیڈا اور اس کے شہریوں کے ساتھ بھی ذمہ داریاں قبول کی تھیں۔
دوسری جانب سی ٹی وی نیوز نے تین ایسے نامعلوم ذرائع کے حوالے سے رپورٹ کیا تھا جنہیں اسٹیلنٹس اور روشن کے درمیان مذاکرات کا براہ راست علم تھا۔ رپورٹ میں کہا گیا کہ وفاقی حکومت ان مذاکرات میں فعال اور بھرپور طور پر شریک تھی، دونوں کمپنیوں کے ساتھ براہ راست رابطے میں رہی اور فروخت کی شرائط سے بھی آگاہ تھی۔
سی بی سی نیوز نے بھی رپورٹ کیا تھا کہ وفاقی حکومت کو کئی ماہ پہلے سے پلانٹ کی ممکنہ فروخت کا علم تھا اور اگست سے اس معاملے پر باقاعدہ رابطے جاری تھے۔
تاہم وزیر صنعت کے دفتر نے ان رپورٹس کی تشریح کو مسترد کرتے ہوئے واضح کیا ہے کہ حکومتی رابطوں کا مقصد اسٹیلنٹس اور یونین کے درمیان تنازع حل کرنا تھا، نہ کہ روشن کے ساتھ فروخت کا معاہدہ طے کرانا۔
روشن کمپنی 2 ہزار سابق ملازمین کو دوبارہ ملازمت دینے پر تیار
اسٹیلنٹس نے پیر کی شام برامپٹن پلانٹ اور اس سے متعلقہ مشینری و آلات روشن انکارپوریشن کو فروخت کرنے کا اعلان کیا تھا، تاہم معاہدے کی مالی تفصیلات ظاہر نہیں کی گئیں۔
دونوں کمپنیوں کے مطابق توقع ہے کہ اس سال کے اختتام تک لین دین مکمل ہوجائے گا، تاہم اس کے لیے حکومتی اور متعلقہ ریگولیٹری منظوریوں سمیت بعض شرائط پوری کرنا ضروری ہوگا۔
روشن کے چیف ایگزیکٹو آفیسر رومن شیمونوف نے کہا ہے کہ ان کی کمپنی برامپٹن پلانٹ سے فارغ کیے گئے اسٹیلنٹس کے بعض سابق ملازمین کو دوبارہ ملازمت دینے کے لیے تیار ہے۔
واضح رہے کہ اسٹیلنٹس نے 2023 میں برامپٹن پلانٹ کی سرگرمیاں روک دی تھیں، جس کے نتیجے میں تقریباً 2 ہزار ملازمین بے روزگار ہوگئے تھے۔ بعدازاں اس پلانٹ کو جیپ کمپاس (Jeep Compass) کی تیاری کے لیے جدید بنانے کا منصوبہ شروع کیا گیا، جس پر 2024 کے آغاز میں کام بھی شروع ہوا۔
تاہم 2025 کے اوائل میں کمپنی نے یہ منصوبہ روک دیا اور بعدازاں جیپ کمپاس کی پیداوار امریکی ریاست الینوائے منتقل کرنے کا اعلان کردیا، جس کے بعد برامپٹن پلانٹ غیر معینہ مدت کے لیے بند پڑا رہا۔
میلانی جولی کی جمعرات کو اسٹیلنٹس اور یونین قیادت سے اہم ملاقات
وزیر صنعت میلانی جولی جمعرات کو ٹورنٹو میں اسٹیلنٹس اور یونائیفور کی قیادت کے ساتھ اہم اجلاس منعقد کریں گی، جس میں اونٹاریو کے وزیر برائے اقتصادی ترقی وک فیڈیلی بھی شریک ہوں گے۔
اجلاس میں پلانٹ کی فروخت، کمپنی کی وفاقی حکومت سے وابستہ ذمہ داریوں، ملازمین کے مستقبل اور پیداوار کی منتقلی سے پیدا ہونے والی صورتحال پر بات چیت متوقع ہے۔
میتھیس ڈینس نے کہا کہ حکومت جس نتیجے کی خواہش مند تھی، موجودہ صورتحال اس کے برعکس ہے اور اب وفاقی حکومت کے پاس اسٹیلنٹس کو اپنی ذمہ داریوں کی خلاف ورزی کا مرتکب قرار دینے کے سوا کوئی راستہ نہیں بچا۔
