اردوورلڈکینیڈا(ویب نیوز)حکومت نے پاکستان اسٹیل ملز (پی ایس ایم) کی ازسرنو بحالی کے لیے کوششیں تیز کر دی ہیں، جبکہ چین، روس، ترکیہ اور سعودی عرب کی جانب سے منصوبے میں دلچسپی سامنے آئی ہے۔
وزارتِ صنعت و پیداوار کے ذرائع کے مطابق چین اور روس کے سرمایہ کاروں کے بعد ترکیہ کے سرمایہ کاروں نے بھی پاکستان اسٹیل ملز کی بحالی کے منصوبے میں دلچسپی کا اظہار کیا ہے، جبکہ سعودی عرب نے بھی ممکنہ سرمایہ کاری کے حوالے سے تفصیلات طلب کر لی ہیں۔
ذرائع کا کہنا ہے کہ پاکستان اسٹیل ملز کی سالانہ پیداواری صلاحیت کو موجودہ سطح سے بڑھا کر تقریباً 30 لاکھ ٹن تک لے جانے کے لیے مختلف تجاویز پر غور کیا جا رہا ہے۔ اس مقصد کے لیے پلانٹ اور مشینری کو جدید ٹیکنالوجی سے ہم آہنگ کرنے کا منصوبہ بھی زیر غور ہے تاکہ ادارے کو عالمی معیار کے مطابق دوبارہ فعال بنایا جا سکے۔
وزارتِ صنعت و پیداوار کے ذرائع کے مطابق پاکستان اسٹیل ملز کی بحالی کے سلسلے میں چینی اور روسی کمپنیوں کے کنسورشیم نے اسٹیل ملز کا دورہ بھی کیا، جہاں ماہرین پلانٹ، مشینری اور مجموعی پیداواری صلاحیت کا تفصیلی جائزہ لے رہے ہیں۔
ذرائع نے مزید بتایا کہ پاکستان اسٹیل ملز کی بحالی کے لیے چین، روس اور دیگر دلچسپی رکھنے والے ممالک کی مشترکہ سرمایہ کاری کا بھی امکان موجود ہے۔
حکومت کا مؤقف ہے کہ اس منصوبے کے ذریعے قومی اسٹیل صنعت کو دوبارہ فعال بنایا جائے گا، ملکی صنعتی پیداوار میں اضافہ ہوگا اور روزگار کے نئے مواقع بھی پیدا ہوں گے۔
