گوگل نے اپنے صارفین کے لیے کلاؤڈ اسٹوریج پالیسی میں بڑی تبدیلی کا اعلان کرتے ہوئے برسوں سے دستیاب ایک مفت سہولت ختم کرنے کا فیصلہ کر لیا ہے۔
نئی پالیسی کے تحت اب اینڈرائیڈ فونز کا مکمل بیک اپ بھی گوگل اکاؤنٹ کی اسٹوریج کا حصہ شمار ہوگا جس سے لاکھوں صارفین کو اضافی اسٹوریج خریدنے یا اپنا ڈیٹا کم کرنے کی ضرورت پیش آ سکتی ہے۔
گوگل کی جانب سے صارفین کو بھیجی گئی ای میلز میں بتایا گیا ہے کہ نئی پالیسی 45 دن بعد نافذ العمل ہوگی۔ اس دوران صارفین کو اپنی اسٹوریج منظم کرنے، غیر ضروری فائلیں حذف کرنے یا بیک اپ سیٹنگز تبدیل کرنے کا موقع دیا گیا ہے۔
اب کون سا ڈیٹا اسٹوریج میں شمار ہوگا؟
اب تک گوگل اکاؤنٹ کی اسٹوریج میں صرف گوگل فوٹوز کی تصاویر اور ویڈیوز، گوگل ڈرائیو کی فائلیں اور جی میل کی ای میلز شامل کی جاتی تھیں جبکہ اینڈرائیڈ فون کا بیک اپ اس حد میں شمار نہیں ہوتا تھا۔
نئی پالیسی کے بعد اینڈرائیڈ فون کی سسٹم سیٹنگز، ایپلیکیشنز کا ڈیٹا، ایس ایم ایس پیغامات، کال ہسٹری اور دیگر بیک اپ فائلیں بھی گوگل اسٹوریج کا حصہ بن جائیں گی جس سے مفت دستیاب اسٹوریج تیزی سے بھر سکتی ہے۔
صارفین کو کیا کرنا ہوگا؟
گوگل نے خبردار کیا ہے کہ اگر کسی صارف کا بیک اپ ڈیٹا اسٹوریج کی مقررہ حد سے تجاوز کر گیا تو اسے یا تو غیر ضروری ڈیٹا حذف کرنا ہوگا یا پھر زیادہ اسٹوریج حاصل کرنے کے لیے گوگل ون کا ماہانہ سبسکرپشن خریدنا ہوگا۔
کمپنی کے مطابق صارفین کو بیک اپ پر زیادہ کنٹرول بھی فراہم کیا جائے گا تاکہ وہ خود فیصلہ کر سکیں کہ کن ایپس اور کس ڈیٹا کا بیک اپ محفوظ رکھا جائے۔
اسٹوریج پالیسی میں مسلسل تبدیلیاں
گوگل کی جانب سے اکاؤنٹ اسٹوریج پالیسی میں یہ حالیہ مہینوں کی ایک اور اہم تبدیلی ہے۔ اس سے قبل کمپنی نے مئی 2026 میں نئے گوگل اکاؤنٹس کے لیے مفت اسٹوریج کو 15 جی بی سے کم کرکے 5 جی بی کرنے کی آزمائش بھی شروع کی تھی جسے صارفین کی جانب سے خاصی توجہ ملی تھی۔
ٹیکنالوجی ماہرین کے مطابق نئی پالیسی کے بعد وہ صارفین جو اپنے اینڈرائیڈ فون کا خودکار بیک اپ استعمال کرتے ہیں ان کی مفت اسٹوریج پہلے کے مقابلے میں زیادہ تیزی سے بھر سکتی ہے جس کے نتیجے میں انہیں اضافی اسٹوریج خریدنے یا بیک اپ ڈیٹا محدود کرنے کا فیصلہ کرنا پڑ سکتا ہے۔
گوگل کا کہنا ہے کہ اس تبدیلی کا مقصد کلاؤڈ اسٹوریج کے استعمال کو زیادہ منظم بنانا اور صارفین کو اپنے ڈیٹا پر بہتر کنٹرول فراہم کرنا ہے تاہم اس فیصلے سے ایسے صارفین ضرور متاثر ہوں گے جو طویل عرصے سے مفت اسٹوریج سہولت پر انحصار کرتے آ رہے ہیں۔
