اردوورلڈکینیڈا(ویب نیوز)جوناتھن ڈیوڈ کی شاندار ہیٹ ٹرک کی بدولت کینیڈا نے جمعرات کو قطر کو 0-6 سے شکست دے کر فیفا ورلڈ کپ کی تاریخ میں اپنی پہلی فتح حاصل کر لی۔
برٹش کولمبیا کے بی سی پلیس اسٹیڈیم میں کھیلے گئے میچ میں 52 ہزار 497 شائقین کی موجودگی میں کینیڈا نے ابتدا ہی سے کھیل پر مکمل گرفت برقرار رکھی۔
جوناتھن ڈیوڈ، جو اپنے گزشتہ چار ورلڈ کپ میچز میں گول کرنے میں ناکام رہے تھے، نے 29ویں منٹ میں پہلا گول کیا۔ انہوں نے پہلے ہاف کے اضافی وقت میں دوسرا اور میچ کے اختتامی اضافی وقت میں تیسرا گول کر کے ہیٹ ٹرک مکمل کی۔ شاندار کارکردگی پر انہیں میچ کا بہترین کھلاڑی قرار دیا گیا۔
کینیڈا کی جانب سے سائل لارین نے 16ویں منٹ میں گول کر کے برتری دلائی، جس پر اسٹیڈیم میں موجود شائقین خوشی سے جھوم اٹھے۔ زخمی اسماعیل کونے کی جگہ میدان میں آنے والے نیتھن سلیبا نے 63ویں منٹ میں جبکہ جیکب شیفلبرگ نے 75ویں منٹ میں گول کر کے برتری مزید مستحکم کر دی۔
کینیڈا کے گول کیپر میکسم کریپو کو پورے میچ میں ایک بھی شاٹ روکنے کی ضرورت پیش نہ آئی اور انہوں نے کلین شیٹ برقرار رکھی۔ میچ میں کینیڈا نے گول پر حملوں کے معاملے میں قطر پر 2 کے مقابلے میں 30 کی واضح برتری حاصل کی۔
اس تاریخی کامیابی کے بعد کینیڈا گروپ بی میں سوئٹزرلینڈ کے ساتھ مشترکہ طور پر پہلی پوزیشن پر آ گیا ہے اور 48 ٹیموں پر مشتمل ٹورنامنٹ کے ناک آؤٹ مرحلے میں رسائی کے امکانات مزید روشن ہو گئے ہیں۔
کینیڈا اپنا اگلا میچ بدھ کے روز بی سی پلیس اسٹیڈیم میں سوئٹزرلینڈ کے خلاف کھیلے گا۔
تاہم فتح کی خوشی اس وقت کچھ ماند پڑ گئی جب اسماعیل کونے 51ویں منٹ میں بائیں ٹانگ کی انجری کا شکار ہو گئے اور انہیں اسٹریچر پر میدان سے باہر لے جایا گیا۔ اس واقعے کے بعد قطر کے مڈفیلڈر عاصم مدیبو کو سرخ کارڈ دکھایا گیا، جس کے نتیجے میں ان کی ٹیم دو کھلاڑیوں کی کمی کے ساتھ میچ مکمل کرنے پر مجبور ہوئی۔
