اوٹاوا (اردو ورلڈ کینیڈا / ویب نیوز) کینیڈا میں پاکستان کے ہائی کمیشن اور مونٹریال، ٹورنٹو اور وینکوور میں قائم پاکستانی قونصل خانوں نے 5 اگست 2019 کے بھارتی اقدامات کی ساتویں برسی کے موقع پر یوم استحصال کشمیر منایا۔ اس موقع پر منعقدہ تقریبات میں بھارتی غیر قانونی زیر قبضہ جموں و کشمیر کے عوام کے ساتھ پاکستان کی غیر متزلزل یکجہتی کا اعادہ کیا گیا اور عالمی برادری پر زور دیا گیا کہ وہ مسئلہ کشمیر کے منصفانہ اور پرامن حل کے لیے اپنا کردار ادا کرے۔
اوٹاوا میں پاکستانی ہائی کمیشن میں منعقدہ مرکزی تقریب میں پاکستانی اور کشمیری کمیونٹی، ماہرین تعلیم، سماجی شخصیات، کمیونٹی رہنماؤں اور کشمیر کے حامی افراد نے بڑی تعداد میں شرکت کی۔ تقریب کا مقصد 5 اگست 2019 کو بھارت کی جانب سے مقبوضہ جموں و کشمیر کی خصوصی آئینی حیثیت ختم کرنے، آرٹیکل 370 اور 35 اے کی منسوخی اور اس کے بعد پیدا ہونے والی صورتحال کو اجاگر کرنا تھا۔
تقریب کے آغاز پر صدر پاکستان، وزیراعظم پاکستان اور نائب وزیراعظم و وزیر خارجہ کے خصوصی پیغامات پڑھ کر سنائے گئے، جن میں کشمیری عوام کے حق خودارادیت کی بھرپور حمایت کا اعادہ کیا گیا اور کہا گیا کہ پاکستان ہر سفارتی، سیاسی اور اخلاقی سطح پر کشمیریوں کی جائز جدوجہد کی حمایت جاری رکھے گا۔
اس موقع پر شرکاء کو بھارتی غیر قانونی زیر قبضہ جموں و کشمیر میں انسانی حقوق کی صورتحال پر مبنی ایک دستاویزی فلم بھی دکھائی گئی، جس میں آزادی اظہار پر پابندیوں، سیاسی رہنماؤں کی گرفتاریوں، طویل نظربندیوں اور دیگر انسانی حقوق کی مبینہ خلاف ورزیوں کو اجاگر کیا گیا۔ تقریب کے دوران تصویری نمائش کا بھی اہتمام کیا گیا، جس میں مقبوضہ کشمیر کے عوام کی مشکلات، تنازع کے انسانی پہلو اور خطے کی موجودہ صورتحال کو تصاویر کے ذریعے پیش کیا گیا۔
کینیڈا میں پاکستان کے ہائی کمشنر محمد سلیم نے تقریب سے خطاب کرتے ہوئے کہا کہ 5 اگست 2019 کے بھارتی اقدامات کو سات سال گزرنے کے باوجود امن، استحکام اور ترقی کے دعوے حقیقت میں تبدیل نہیں ہو سکے۔ انہوں نے کہا کہ بنیادی آزادیوں پر مسلسل پابندیاں، آبادیاتی تبدیلیاں، طویل نظربندیاں اور انسانی حقوق کی خلاف ورزیوں سے متعلق رپورٹس عالمی برادری کے لیے بدستور تشویش کا باعث ہیں۔
ہائی کمشنر نے کہا کہ جموں و کشمیر ایک بین الاقوامی سطح پر تسلیم شدہ حل طلب تنازع ہے، جس کا پائیدار اور منصفانہ حل اقوام متحدہ کی سلامتی کونسل کی متعلقہ قراردادوں اور کشمیری عوام کی خواہشات کے مطابق ہونا چاہیے۔ انہوں نے عالمی برادری پر زور دیا کہ وہ خطے میں امن و استحکام کے لیے اپنی ذمہ داریاں ادا کرے اور کشمیری عوام کے بنیادی حقوق کے تحفظ کے لیے مؤثر اقدامات کرے۔
تقریب کے اختتام پر شرکاء نے کشمیری عوام کے ساتھ اظہار یکجہتی کرتے ہوئے اس عزم کا اعادہ کیا کہ مسئلہ کشمیر کے پرامن اور منصفانہ حل تک ان کی سیاسی، سفارتی اور اخلاقی حمایت جاری رکھی جائے گی۔
