ورلڈ کپ جشن کی یادگار

رپورٹس کے مطابق یہ وہی یادگار ریپلیکا ٹرافی ہے جسے قطر میں ورلڈ کپ جیتنے کے بعد ارجنٹینا کے کھلاڑیوں نے جشن کے دوران اٹھایا تھا۔ بعد ازاں اسے ارجنٹینا کے دارالحکومت بیونس آئرس کے نیشنل ہسٹوریکل میوزیم میں بھی نمائش کے لیے پیش کیا گیا۔

اس ٹرافی کی اہمیت اس لیے بھی بڑھ گئی ہے کہ اس کا تعلق ارجنٹینا کی تاریخی فتح اور لیونل میسی کے کیریئر کے یادگار ترین لمحات سے ہے۔ اس پر ارجنٹینا کی ٹیم کے آٹھ کھلاڑیوں کے دستخط بھی موجود ہیں، جو اسے کھیلوں کی یادگار اشیا جمع کرنے والے شائقین کے لیے خصوصی اہمیت دیتے ہیں۔

فرانس کے خلاف تاریخی فتح

یاد رہے کہ 18 دسمبر 2022 کو قطر کے لوسیل اسٹیڈیم میں کھیلے گئے فیفا ورلڈ کپ کے فائنل میں ارجنٹینا نے فرانس کو پنالٹی شوٹ آؤٹ میں 2-4 سے شکست دے کر عالمی چیمپئن بننے کا اعزاز حاصل کیا تھا۔

مقررہ وقت اور اضافی وقت کے اختتام پر دونوں ٹیموں کا مقابلہ 3-3 گول سے برابر رہا تھا۔ لیونل میسی نے فائنل میں دو گول کیے، جبکہ فرانس کے اسٹار کھلاڑی کائیلیان ایمباپے نے تین گول کرکے مقابلے کو سنسنی خیز بنا دیا تھا۔ فیصلہ کن پنالٹی شوٹ آؤٹ میں ارجنٹینا نے کامیابی حاصل کرکے تیسری مرتبہ ورلڈ کپ اپنے نام کیا۔

میسی کی تصویر سوشل میڈیا پر مقبول

ورلڈ کپ جیتنے کے بعد لیونل میسی کی ٹرافی اٹھائے تصویر نے سوشل میڈیا پر بھی غیر معمولی مقبولیت حاصل کی تھی۔ انسٹاگرام پر اس تصویر کو 7 کروڑ 40 لاکھ سے زائد لائکس ملے، جس کے باعث یہ پلیٹ فارم کی سب سے زیادہ پسند کی جانے والی تصاویر میں شامل ہوگئی۔

میسی کی اس تصویر اور ٹرافی سے وابستہ یادیں آج بھی دنیا بھر میں فٹبال شائقین کے لیے خاص اہمیت رکھتی ہیں۔ مجوزہ نیلامی کے ذریعے اس یادگار ریپلیکا کو کھیلوں کی تاریخ سے متعلق اشیا جمع کرنے والے افراد کے سامنے پیش کیا جائے گا۔

تاہم نیلامی میں ٹرافی کی متوقع قیمت، بولی کی ابتدائی رقم اور ممکنہ خریداروں سے متعلق تفصیلات فوری طور پر سامنے نہیں آئیں