43

اردوورلڈکینیڈا(ویب نیوز)اسلام آباد کی انسداد دہشت گردی عدالت میں ایمان مزاری اور ہادی علی چٹھہ کے خلاف بیرئیر ہٹانے کے کیس کی سماعت ہوئی، جہاں عدالت نے دونوں ملزمان پر فرد جرم عائد کردی۔

عدالت میں پیشی

کیس کی سماعت انسداد دہشت گردی عدالت کے جج طاہر عباس سپرا نے کی۔ ڈاکٹر شیریں مزاری، وکیل ایمل خان مندوخیل، زینب جنجوعہ اور دیگر عدالت میں پیش ہوئے، جبکہ پراسیکیوٹر راجہ نوید بھی عدالت کے سامنے موجود تھے۔ایمان مزاری اور ہادی علی چٹھہ کو عدالت میں ویڈیو لنک کے ذریعے پیش کیا گیا۔

ملاقات نہ کرانے کا اعتراض

زینب جنجوعہ نے عدالت کو بتایا کہ عدالتی حکم کے باوجود ان کی ایمان مزاری اور ہادی علی چٹھہ سے ملاقات نہیں کرائی گئی، جبکہ دونوں کو کیس کی کاپیاں بھی فراہم نہیں کی گئیں۔

انہوں نے کہا کہ وہ دو گھنٹے جیل کے باہر انتظار کرتی رہیں لیکن عدالتی حکم کے باوجود ملاقات نہیں کرائی گئی۔ زینب جنجوعہ نے عدالت سے استدعا کی کہ ایمان مزاری اور ہادی علی چٹھہ کو عدالت میں پیش کیا جائے۔

جیل رپورٹ کا ذکر

جج طاہر عباس سپرا نے کہا کہ ان کے پاس جیل حکام کی رپورٹس موجود ہیں۔اس پر زینب جنجوعہ نے سوال اٹھایا کہ اڈیالہ جیل سے دیگر قیدی عدالتوں میں پیش ہونے کے لیے آ رہے ہیں تو ایمان مزاری اور ہادی علی چٹھہ کو عدالت میں کیوں پیش نہیں کیا جا رہا۔

فرد جرم عائد

عدالت نے ایمان مزاری اور ہادی علی چٹھہ پر فرد جرم عائد کردی اور آئندہ سماعت پر استغاثہ کے گواہوں کو طلب کرلیا۔

یہ بھی پڑھیں :اسلام آباد ہائیکورٹ نے ایمان مزاری کو کسی بھی مقدمے میں گرفتارکرنے سے روک دیا

تاہم ہادی علی چٹھہ نے فرد جرم کی کارروائی پر اعتراض کرتے ہوئے کہا کہ انہیں ابھی تک کیس کی کاپیاں فراہم نہیں کی گئیں، جب تک قانونی تقاضے پورے نہیں ہوتے اس وقت تک فرد جرم عائد نہیں کی جا سکتی۔

وکیل کا اعتراض

زینب جنجوعہ نے بھی اعتراض کرتے ہوئے کہا کہ نہ ایمان مزاری اور ہادی علی چٹھہ کو کیس کی کاپیاں فراہم کی گئی ہیں اور نہ ہی وکلا کو ان سے ملاقات کی اجازت دی گئی، اس لیے تمام قانونی تقاضے پورے کیے بغیر فرد جرم عائد نہیں کی جا سکتی۔

عدالت کا فیصلہ

عدالت نے تمام اعتراضات کے باوجود ایمان مزاری اور ہادی علی چٹھہ پر فرد جرم عائد کردی۔جج طاہر عباس سپرا نے زینب جنجوعہ سے مکالمہ کرتے ہوئے کہا کہ وہ اس حکم کو چیلنج کر سکتی ہیں۔

عدالت نے آئندہ سماعت پر ایمان مزاری اور ہادی علی چٹھہ کو عدالت میں پیش کرنے کا حکم دیتے ہوئے کیس کی سماعت 9 اکتوبر تک ملتوی کردی۔