اردوورلڈکینیڈا(ویب نیوز)مہنگے لگژری ہینڈ بیگز کو بھول جائیں، کیونکہ کینیڈا میں ان دنوں صرف 1.99 کینیڈین ڈالر قیمت کا ایک عام شاپنگ بیگ سوشل میڈیا پر سب کی توجہ کا مرکز بنا ہوا ہے۔ کینیڈا کی مشہور ریٹیل کمپنی Canadian Tire کا سرخ اور سیاہ چیک ڈیزائن والا دوبارہ استعمال ہونے والا بیگ اچانک فیشن کی نئی علامت بن گیا ہے، اور اس کی وجہ ایک معروف ٹی وی اداکار ہیں۔

ایک تصویر نے سب بدل دیا

مقبول کینیڈین ڈرامہ Heated Rivalry کے مرکزی اداکار ہڈسن ولیمز اس وقت سوشل میڈیا پر زیرِ بحث آ گئے جب انہیں ٹورنٹو کی سڑکوں پر اپنے ساتھی اداکار کونر اسٹوری کے ساتھ یہی سستا شاپنگ بیگ اٹھائے دیکھا گیا۔مداحوں نے جیسے ہی تصاویر اور ویڈیوز دیکھیں، یہ عام سا بیگ راتوں رات ایک وائرل فیشن آئٹم میں تبدیل ہوگیا۔

مداحوں کی دوڑ

ٹک ٹاک، ایکس (سابقہ ٹوئٹر) اور تھریڈز سمیت مختلف سوشل میڈیا پلیٹ فارمز پر ہزاروں صارفین اس بیگ کی تلاش میں نکل پڑے۔ متعدد ویڈیوز میں صارفین مختلف Canadian Tire اسٹورز میں جا کر یہی بیگ ڈھونڈتے دکھائی دے رہے ہیں۔کئی مداحوں نے مذاق میں کہا کہ یہی بیگ دراصل Heated Rivalry کا "غیر سرکاری مرچنڈائز” بن چکا ہے، کیونکہ ہر مداح اسے حاصل کرنا چاہتا ہے۔

دلچسپ تبصرے

سوشل میڈیا پر اس بیگ سے متعلق دلچسپ تبصرے بھی سامنے آئے۔ایک صارف نے لکھا کہ اگر ہڈسن ولیمز Canadian Tire کا بیگ اتنا مشہور بنا سکتے ہیں تو شاید وہ کینیڈا کے مشہور اسٹور Hudson’s Bay کو بھی بچا سکتے تھے۔ایک اور صارف نے مذاق کرتے ہوئے لکھا کہ شاید Canadian Tire نے اپنی تاریخ میں پہلی بار ایک ری یوز ایبل بیگ اتنی بڑی تعداد میں فروخت کیا ہوگا۔

امریکہ تک جنون

یہ رجحان صرف کینیڈا تک محدود نہیں رہا بلکہ امریکہ سمیت دیگر ممالک میں موجود Heated Rivalry کے مداح بھی اس بیگ کے حصول کے لیے بے تاب ہیں۔

متعدد امریکی مداحوں نے سوشل میڈیا پر کینیڈین دوستوں سے درخواست کی کہ وہ ان کے لیے یہ بیگ خرید کر بھیجیں، جبکہ بعض افراد نے رضاکارانہ طور پر سرحد پار بیگ بھیجنے کی پیشکش بھی کی۔

اسٹورز میں قلتیہ 

گریٹر ٹورنٹو ایریا کے بیشتر Canadian Tire اسٹورز میں یہ بیگ تقریباً فروخت ہو چکا ہے۔ٹورنٹو کے یونگ اور ڈنڈاس علاقے میں واقع ایک اسٹور کے ملازم نے بتایا کہ پہلے اس بیگ کی زیادہ مانگ نہیں تھی، لیکن اچانک لوگوں نے آ کر بڑی تعداد میں اسے خریدنا شروع کر دیا۔

یہ بھی پڑھیں :ٹرینڈی ایڈز،مونٹریال کےمسلم صدراورہیلوواسٹریٹ قتل،کینیڈا کےدہل ہلادینےوالےتاریخی واقعات

انہوں نے بتایا کہ ایک گاہک تو صرف اس لیے آیا کیونکہ اس نے سن رکھا تھا کہ ایک مشہور اداکار نے یہی بیگ استعمال کیا ہے، اور اس خدشے کے پیش نظر کہ بیگ جلد ختم ہو جائے گا، اس نے ایک ساتھ پانچ بیگ خرید لیے۔

ویب سائٹ پر دلچسپ ریویوز

بیگ کی مقبولیت بڑھنے کے بعد Canadian Tire کی ویب سائٹ پر موجود اس پروڈکٹ کے ریویو سیکشن میں بھی مداحوں نے دلچسپ تبصرے کرنا شروع کر دیے۔

ایک صارف نے لکھا، "اگر یہ بیگ ہڈسن ولیمز کے لیے کافی اچھا ہے تو میرے لیے بھی بہترین ہے۔”دوسرے مداح نے مزاحیہ انداز میں لکھا، "یہ تو Balenciaga سے بھی بہتر ہے،” جس میں انہوں نے مشہور لگژری برانڈ کا نام اداکار کے نئے پراجیکٹ Yaga کے ساتھ جوڑ کر دلچسپ جملہ بنایا۔

پہلے بھی ریکارڈ فروخت

یہ پہلی بار نہیں کہ Heated Rivalry سے متاثر ہو کر کوئی چیز وائرل ہوئی ہو۔اسی سال کینیڈین برانڈ Province of Canada نے ڈرامے میں اداکار کے پہنے گئے فلیس جیکٹ کی نقل تیار کی تھی، جس کی قیمت 356 کینیڈین ڈالر رکھی گئی۔یہ جیکٹ فروخت کے لیے پیش ہونے کے صرف دس منٹ کے اندر مکمل طور پر فروخت ہوگئی تھی، جس نے مداحوں کے غیر معمولی جوش کا ثبوت دیا۔

کمپنی بھی خوش

Canadian Tire نے بھی اس غیر متوقع مقبولیت سے بھرپور فائدہ اٹھانا شروع کر دیا ہے۔کمپنی نے اپنے سرکاری انسٹاگرام اکاؤنٹ پر مداحوں کی تصاویر اور پوسٹس دوبارہ شیئر کیں، جبکہ کمپنی کی سینئر نائب صدر برائے مارکیٹنگ ایوا سیلم نے تصدیق کی کہ ہفتے کے روز سے اس مخصوص بیگ کی طلب میں غیر معمولی اضافہ دیکھنے میں آیا ہے۔کمپنی کے مطابق گزشتہ دو دنوں کے دوران اس بیگ کی فروخت معمول کے مقابلے میں تقریباً 30 گنا زیادہ رہی، جو ایک عام شاپنگ بیگ کے لیے غیر معمولی ریکارڈ ہے۔

دوسرے سیزن کا انتظار

ماہرین کا کہنا ہے کہ اس بیگ کی وائرل مقبولیت کی ایک بڑی وجہ Heated Rivalry کے دوسرے سیزن کا بے حد انتظار بھی ہے۔رپورٹس کے مطابق ڈرامے کے دوسرے سیزن کی شوٹنگ اس وقت کینیڈا کے مختلف شہروں میں جاری ہے، جبکہ مداح نئی قسطوں کی ریلیز سے پہلے ہی ہر اس چیز کو یادگار بنانا چاہتے ہیں جس کا تعلق اس سیریز یا اس کے اداکاروں سے ہو۔