اردو ورلڈ کینیڈا ( ویب نیوز ) متحدہ عرب امارات نے ملکی تاریخ میں پہلی مرتبہ باقاعدہ مسافر ٹرین سروس کا آغاز کرتے ہوئے جدید قومی ریلوے نیٹ ورک کی جانب ایک اہم سنگ میل عبور کر لیا ہے۔
اس منصوبے کے تحت ملک کی مختلف ریاستوں کو جدید اور تیز رفتار ریلوے نظام کے ذریعے ایک دوسرے سے جوڑا جا رہا ہے، جس سے عوام کو سفر کی بہتر سہولتیں میسر آئیں گی جبکہ تجارت، سرمایہ کاری اور سیاحت کے شعبوں کو بھی فروغ حاصل ہوگا۔اس منصوبے کا باقاعدہ افتتاح ابوظبی کے ولی عہد شیخ خالد بن محمد بن زاید آل نہیان نے محمد بن زاید سٹی میں قائم نئے مسافر ریلوے اسٹیشن کا افتتاح کرکے کیا۔
تقریب سے خطاب کرتے ہوئے حکام نے کہا کہ یہ منصوبہ متحدہ عرب امارات کے جدید انفراسٹرکچر وژن کا اہم حصہ ہے اور اس سے مختلف امارات کے درمیان رابطوں کو مزید مضبوط بنانے میں مدد ملے گی۔حکام کے مطابق عوام کے لیے پہلی مسافر ٹرین سروس 30 جون 2026 سے ابوظبی اور فجیرہ کے درمیان دستیاب ہوگی۔ اس روٹ پر سفر کا دورانیہ صرف ایک گھنٹہ 45 منٹ رکھا گیا ہے، جو سڑک کے ذریعے سفر کے مقابلے میں زیادہ آرام دہ اور مؤثر متبادل ثابت ہوگا۔
ٹرین کا ابتدائی کرایہ 55 درہم مقرر کیا گیا ہے جبکہ پریمیئم کلاس میں سفر کرنے والے مسافروں کے لیے ٹکٹ 120 درہم میں دستیاب ہوگا۔ریلوے منصوبے کی توسیع کے تحت 30 ستمبر 2026 کو دبئی اور الذید میں بھی نئے ریلوے اسٹیشنز کھولے جائیں گے، جس سے مزید لاکھوں افراد کو جدید سفری سہولتیں میسر آئیں گی۔ اسی طرح ابوظبی کے مغربی علاقے الظفرہ میں ریلوے سروس دسمبر 2026 سے شروع کی جائے گی جبکہ شارجہ کا مرکزی ریلوے اسٹیشن مارچ 2027 میں قومی ریلوے نیٹ ورک کا حصہ بن جائے گا۔
اماراتی حکام کا کہنا ہے کہ قومی ریلوے منصوبہ نہ صرف عوامی نقل و حمل کے نظام کو جدید بنائے گا بلکہ مختلف ریاستوں کے درمیان تجارتی سرگرمیوں میں اضافے، سیاحتی مقامات تک آسان رسائی اور اقتصادی ترقی کے نئے مواقع پیدا کرنے میں بھی اہم کردار ادا کرے گا۔
ماہرین کے مطابق جدید ریلوے نیٹ ورک سڑکوں پر ٹریفک کے دباؤ میں کمی، ایندھن کے استعمال میں بچت اور ماحول دوست سفری سہولتوں کے فروغ میں بھی معاون ثابت ہوگا۔متحدہ عرب امارات کی حکومت اس منصوبے کو ملک کے طویل المدتی ترقیاتی وژن کا اہم ستون قرار دے رہی ہے، جس کا مقصد عالمی معیار کا مربوط ٹرانسپورٹ نظام قائم کرکے شہریوں، مقیم غیر ملکیوں اور سیاحوں کو تیز، محفوظ اور آرام دہ سفری سہولتیں فراہم کرنا ہے۔
