اردوورلڈکینیڈا(ویب نیوز)امریکی آئیڈل کے سیزن 24 کا فائنل گیارہ مئی دو ہزار چھبیس کی رات منعقد ہوا، جس میں پچیس سالہ ہانا ہارپر کو فاتح قرار دیا گیا۔

تین گھنٹے طویل اس مقابلے میں ہانا ہارپر کا مقابلہ دیگر دو مضبوط امیدواروں جورڈن میک کلو اور کیلا رچرڈسن سے تھا، تاہم اپنی شاندار کارکردگی کی بدولت انہوں نے یہ باوقار ٹائٹل اپنے نام کر لیا۔

میزبان ریان سیکرسٹ کی جانب سے فاتح کا اعلان ہوتے ہی ہانا ہارپر جذباتی ہو گئیں اور انہوں نے اس لمحے کو ناقابلِ یقین قرار دیتے ہوئے کہا کہ انہیں ایسا لگ رہا ہے جیسے یہ سب ایک خواب ہو۔

انہوں نے اپنی جیت پر بات کرتے ہوئے کہا کہ یہ پورا سفر ان کے لیے سیکھنے اور خود کو نکھارنے کا بہترین موقع رہا جس پر وہ بے حد شکر گزار ہیں۔

امریکی آئیڈل کا یہ سیزن نومبر دو ہزار پچیس میں شروع ہوا تھا، اور اس کے مختلف مراحل نیو یارک، لاس اینجلس اور ہوائی میں منعقد کیے گئے تھے۔

فائنل کے موقع پر ہانا ہارپر کا خاندان بھی اسٹیج پر موجود تھا اور ان کی جیت کے لمحے پر خوشی سے نہال نظر آیا۔