پیپلز پارٹی رہنمائوں کا کہنا ہے کہ نگران حکومتوں کا تعصب ہر گزرتے دن کے ساتھ واضح ہوتا جا رہا ہے کیونکہ وہ مسلم لیگ (ن) کے سربراہ نواز شریف کے ساتھ ‘خصوصی سلوک کر رہی ہیں۔
الیکشن کمیشن کے اعلان کے مطابق انتخابات جنوری 2024 کے آخری ہفتے میں ہونے کا ‘امکان ہے تاہم تاحال کوئی باضابطہ شیڈول جاری نہیں کیا گیا جس کے باعث متعلقہ حلقوں میں غیر یقینی کی صورتحال بڑھ رہی ہے۔
پیپلز پارٹی کے سیکرٹری جنرل نیئر بخاری نے کہا کہ الیکشن کی تاریخ نہ دینے کا ذمہ دار الیکشن کمیشن اور سپریم کورٹ ہے۔
انہوں نے کہا کہ سب کو لیول پلیئنگ فیلڈ نہ دی گئی تو انتخابی نتائج پر سوالات اٹھیں گے، انتخابی نتائج تسلیم نہ کیے گئے تو ملک کو آئینی بحران کا سامنا کرنا پڑے گا۔
انہوں نے کہا کہ نگران حکومتوں کی جانبداری ہر گزرتے دن کے ساتھ واضح ہو رہی ہے، پنجاب حکومت کس بنیاد پر سزائیں معطل کر رہی ہے؟
پیپلز پارٹی کی نائب صدر سینیٹر شیری رحمان نے بھی میڈیا سے گفتگو میں انتخابات کی تاریخ کے حوالے سے غیر یقینی صورتحال پر تشویش کا اظہار کیا۔
انہوں نے کہا کہ انتخابات میں تاخیر سے غیر یقینی صورتحال پیدا ہو رہی ہے اور الیکشن کمیشن کی ساکھ پر سوالات اٹھ رہے ہیں۔ چیئرمین پیپلز پارٹی بلاول بھٹو زرداری مسلسل انتخابات کی تاریخ کے اعلان کا مطالبہ کر رہے ہیں تاہم الیکشن کمیشن نے کوئی جواب نہیں دیا۔
شیری رحمان نے کہا کہ ایک طرف ہم الیکشن کی تاریخ کے اعلان کا انتظار کر رہے ہیں اور دوسری طرف ووٹر رجسٹریشن اور معلومات کی اپ ڈیٹ کی آخری تاریخ 28 اکتوبر تک بڑھا دی گئی ہے۔
انہوں نے کہا کہ تنازعات سے بچنے کے لیے الیکشن کمیشن کو فوری طور پر انتخابات کی تاریخ کا اعلان کرنا چاہیے کیونکہ ہمارا پختہ یقین ہے کہ انتخابات میں تاخیر کا مطلب عوام کے ووٹ کے حق سے انکار ہے۔
پیپلز پارٹی سب کیلئے لیول پلیئنگ فیلڈ چاہتی ہے آزادانہ صاف شفاف انتخابات کے ذریعے پارلیمانی جمہوری نظام کا قیام آئینی تقاضہ ہے، سید نیئر حسین بخاری
مزید پڑھیں: https://t.co/56A1kUaFK8 pic.twitter.com/lssGgsf38b
— Pakistan Peoples Party – PPP (@PPP_Org) October 25, 2023
پیپلز پارٹی نے واضح کیا کہ پی ٹی آئی کے بغیر عام انتخابات کے نتائج کو کوئی قبول نہیں کرے گا، پیپلز پارٹی پنجاب کے قائم مقام صدر رانا فاروق نے گزشتہ روز لاہور میں پریس کانفرنس کرتے ہوئے کہا کہ چیئرمین پی ٹی آئی عمران خان اور ان کی پارٹی نے جو کچھ کیا ہم اس کی حمایت نہیں کرتے اور ان سے ان کے اعمال کا جوابدہ ہونا چاہیے لیکن یاد رہے کہ پی ٹی آئی کے بغیر کوئی بھی عام انتخابات کے نتائج کو قبول نہیں کرے گا۔
