اردوورلڈکینیڈا(ویب نیوز)معرکہ حق کی تقریبات کے سلسلے میں اسلام آباد ٹریفک پولیس نے شہریوں کیلئے خصوصی ٹریفک ڈائیورژن پلان جاری کر دیا ہے، جس کے تحت مختلف شاہراہوں پر ٹریفک کی آمدورفت محدود رہے گی۔
ٹریفک پولیس کے مطابق شام 6 بجے سے رات 12 بجے تک سری نگر ہائی وے کو کوڑیانوالہ چوک سے پشاور موڑ تک مکمل طور پر ٹریفک کیلئے بند رکھا جائے گا۔ اسی طرح ایکسپریس وے پر فیض آباد سے خیابان چوک تک فیصل ایونیو بھی بند رہے گی۔
پولیس نے موٹروے سے مری جانے والے شہریوں کو نائنتھ ایونیو اور کرنل شیر خان روڈ استعمال کرنے کی ہدایت کی ہے، جبکہ مری اور بھارہ کہو سے موٹروے جانے والوں کیلئے مری روڈ اور آئی جے پی روڈ تجویز کی گئی ہے۔
ریڈ زون سے راولپنڈی جانے والے شہری مارگلہ روڈ یا جناح ایونیو استعمال کریں گے، جبکہ راولپنڈی سے اسلام آباد آنے والوں کو فقیر ایپی روڈ اور نائنتھ ایونیو اختیار کرنے کا مشورہ دیا گیا ہے۔
اسی طرح مری سے روات جانے والے شہری پارک روڈ اور لہتراڑ روڈ استعمال کریں گے، جبکہ پشاور موڑ سے روات جانے والوں کو نائنتھ ایونیو، اسٹیڈیم روڈ اور راول روڈ استعمال کرنے کی ہدایت کی گئی ہے۔
اسلام آباد ٹریفک پولیس کے مطابق شام 5 بجے سے رات 12 بجے تک ایل ٹی وی گاڑیوں کو روات سے راولپنڈی کی طرف موڑا جائے گا، جبکہ 10 مئی کو صبح 4 بجے سے رات 12 بجے تک ہر قسم کی ہیوی ٹریفک کے اسلام آباد میں داخلے پر پابندی عائد رہے گی۔
